Do It Yourself “DIY” - " إعملها بنفسك "

 

مبدأ "إعملها بنفسك" مبدأ معروف جداً في بلاد بره ومتأكد إن في ناس كتير تعرفه هنا كمان. المبدأ ده تعريفه بكل بساطة هو: "طريقة بنا وتعديل أو تصليح الحاجات من غير الإحتياج لمساعدة مباشرة من خبراء أو متخصصين" يعني إيه الكلام دة؟ وإزاي هيساعدني مبدأ "إعملها بنفسك" ده في حل المشاكل اللي بتواجهني في بيتي؟

في التعريف الأكاديمي لمبدأ إعملها بنفسك ده، الأبحاث بتقولنا إن ده سلوك من خلاله الأفراد بيستخدموا مواد خام أو مواد شبه خام عشان ينتجوا أو يبنوا حاجات جديدة يمتلكوها وتنفعهم في حياتهم وبيقولوا إن الحافز الرئيسي للناس أنهم يبتدوا يتبعوا السلوك ده هو حاجة إسمها "حوافز السوق" زي: غلو المعيشة، نقص المنتجات، غياب الجودة

ماشي دي فعلا كلها مشاكل بنعاني منها في السوق المصري. بس مين قال إن الناس مستعدة إنها تتبع مبدأ "إعملها بنفسك" ده دلوقتي؟ سؤال حلو بس قبل ما أجاوبك خليني أنا أسألك سؤال، فيه حد في الدنيا بيحب يضّحك عليه؟ لو إجابتك لأ يبقي أنت أكيد مستعد. و حتى لو مش هتعملها بنفسك هتتعلم ومحدش هيضحك عليك تاني بس خليني أقولك أن في خمس فوايد لمبدأ "إعملها بنفسك" ده أنت مش واخد بالك منهم

١ ) هتوفر فلوس

تخيل معايا إنك ركبت شبابيك بيتك ودهنت الحيطان من غير ما تجيب صنايعية، أقل واجب هتوفر٥٠٪ من فلوسك

٢ ) هتتعلم مهارة جديدة

إذا كان بيتك جديد أو بقالة ١٠٠ سنه، أكيد فيه حاجات هتتكسر أو هتعوز صيانة. كل ما حليت مشاكل أكتر كل ما هتفهم كل حاجة في بيتك شغالة إزاي. يعني لو علمّت نفسك السباكة مثلا، عمرك ما هتتخض تاني لو ماسورة في بيتك ضربت

وبدل ما تدفع فلوس كتير لسباك عشان يصلحلك الماسورة مش هتفكر مرتين إنك تصلحها بنفسك

٣ ) هتخس

فاكرني بهزر صح؟ أنت هتخس عشان هتعمل مجهود وهتخس كمان عشان مش هيبقي عندك وقت تاكل

٤ ) هتزود دخلك وتعمل فلوس

في ناس كتير عدت مرحلة إنها توفر فلوس وبقت حرفياً بتعمل فلوس من مبدأ "إعملها بنفسك" مش لازم تصلّح حاجات للناس ممكن تعمل صفحة عالفيس بوك أو على يوتيوب وتعلم الناس اللي أنت إتعلمته وكل ما زاد متابعينك كل ما زادت فرصك إنك تعمل فلوس

أنت مش بس هتخلي بيتك جميل، أنت كمان هتخلّي قيمته تزيد عشان لو فكرت في يوم تأجر بيتك أو تبيعه هتزود في تمنة بفضل اللي أنت عملته فيه

٥ ) الناس هتقدرك وتحترمك اكتر

أنا عارف إن المبدأ مخيف شوية لكتير مننا، طبيعي إن إحنا نخاف نبوّظ الدنيا وفي الآخر نروح نجيب صنايعية عشان يصلحوا اللي باظ. بس صدقني أول ما تنجح في أول مشروع صغير في بيتك وتبتدي تتكلم عن بيتك والشغل اللي عملته فيه الناس هتعجب بيك بمجهودك وذكائك وكل ما هتنجز حاجه في بيتك هتقدر تفتخر بيها وسط صحابك

إحنا في مركزي دوت كوم هنساعدك تتعلم إزاي تحل مشاكل بيتك بنفسك

إقرا المقال الجاي من هنا عشان تعرف هنحل المشاكل دي كلها إزاي مع بعض

وتابعنا علي صفحتنا علي الفيس بوك  من هنا عشان تتعرف اكتر علي شغلنا

عشان حتي لو مش عايز أو معندكش وقت يبقي عالأقل تتعلم و تعرف عشان لما تجيب صنايعي تبقي فاهم هو بيعمل إية وميضحكش عليك