حل أسهل

حلو موضوع أني أعملها بنفسي ده.

يا عم حلو إية؟ الكلام ده لو أنا فاضي، أنا ورايا مليون ألف حاجة ومش عايز بأة أقعد أجرب في شقتي.

بقولك إية أنا هجيب صنايعي فاهم يا عم وأدفعله شوية مش مشكلة.

 كلام جميل وموزون، مش عايز تخاطر صح؟ عايز تخليك في المضمون وتوفر وقتك. كلام محترم جدا؛ بس خليني أسألك سؤال؛ تضمن منين أن الصنايعي اللي هتجيبة هيعملك شغل نضيف. مش عارف صح؟ يبقي لو مش هتعملها بأيدك عالاأقل عالأقل اتعلم الصنايعي بيعملها إزاي.

 إحنا اتفقنا أننا مش عايزين حد يضحك علينا صح؟ يبقي لازم نكون فاهمين. وانت ليك حرية الاختيار بعد كدة عايز تعملها بأيدك عايز تجيب صنايعي يعملهالك، المهم تبقي فاهم هو بيعمل إيه عشان ميضحكش عليك.

 على فكره التشطيبات مش معجزه واللي يقولك غير كده بيتفزلك عليك. الموضوع مش محتاج غير حبة قرايه وتفتيح دماغ وهتبقي أجدع من أجدعها مهندس، اللي بيكلمك دة مهندس علي فكرة واشتغل في مشاريع بشعر راسة.

 وبعدين هو انت بتشتغل في بيت حد غريب ده بيتك يعني واجهتك يعني لازم كل حاجه بتتعمل فيه تكون على مزاجك و زي مانت عايز. أنا شايف أنك تستحق كدة.

 مش هحاول أقنعك اكتر من كده؛ انت عارف إني عندي حق وأنك لازم تفهم عشان محدش يضحك عليك.

  يبقي خلينا نخش في الموضوع ونتكلم علي مثال عملي علي طول. مين فينا متعرضش لمشكلة عزل قبل كدة؟

 إية؟! عزل؟! هو يعني إية عزل؟ وبنعزل ليه أصلا؟

 بص يا سيدي في أنواع كتيرة للعزل تعتمد على انت عايز تعزل إية. يعني مثلا لو انت ساكن في الدور الأخير وحاسس أن البيت بيبقي حر جدا في الصيف لدرجة أنه ممكن يؤثر عالتكييفات ويبوظها يبقي انت محتاج تعزل حرارة. إنما لو انت قاعد في بيتك مثلا وسمعت جارك بيتخانق مع مراتة وصوتهم عالي يبقي انت محتاج تعزل صوت. لكن لو كل ما الدنيا تمطر أو ماسورة تضرب في الشقة اللي فوقيك تلاقي الدهان في السقف أو الحيطة باشوا والدهان ابتدي يقع أو حديد السقف ابتدي يبان يبقي انت محتاج تعزل رطوبة يا معلم.

 يعني من الآخر على رأي إخواننا الصنايعية كل حاجة و ليها حاجة، بس عشان تبقي فاهم لازم تعرف كل عزل إية أنواعة و بيتنفذ إزاي.

إقرا المقال الجاي من هنا عشان تعرف هنحل المشاكل دي كلها إزاي مع بعض

وتابعنا علي صفحتنا علي الفيس بوك  من هنا عشان تتعرف اكتر علي شغلنا

و لو عندك مشكلة في بيتك و عايزنا نساعدك في حلها إبعتلنا عالأيميل دة info@markazzy.com  و هيكلمك واحد من المهندسين المتخصصين بتوعنا و يساعدوك في حل مشكلتك إن شاء اللة.