"عزل الحراره"

في وقت دخول الصيف ومع ارتفاع درجة حرارة الجو، سكان الادوار الاخيره بيبتدوا معاناة كل سنه

درجة الحراره بتعلي جدا داخل الشقق، وبتخلي الجو في البيت حار جدا، وطبعا ده بيخلي قضاء الوقت في البيت فكره مش مريحه، ده غير ان ارتفاع درجة الحراره بيكون سبب رئيسي في ارتفاع فاتورة الكهربا و ساعات كمان بيؤدي لتلف التكييفات

 

مشكله صعبه، مش كده؟ هي مشكله صعبه فعلا، بس حلها موجود 

 

بس قبل ما نقولك الحل، في حاجه مهمة لازم تاخد بالك منه: وهي ان عزل الحراره ليه مواد وطرق بتختلف تماما عن عزل الرطوبه

 

فالو حابب تعرف معلومات اكتر عن عزل الرطوبه، هتلاقيها في المقال ده

 

بس الميزه الكويسه جدا في عزل الحراره انه لو اتعمل مظبوط مش بيحتاج يتغير وبيفضل بحالته طول العمر، ده غير ان في انواع عزل حراري بتكون كمان عازله للصوت وبالتالي بتقلل كمان من الضوضاء اللي جايه من الشارع

 

وعشان كده احنا جينا النهارده نقولك علي ٦ طرق تعزل بيهم سطح بيتك من الحراره

 

١- مادة السيليولوز

ودي ماده خام بتدخل في صناعة الورق، ومعروفه بإنها مش بيكون فيها فراغات، فابتكون عازل كويس جدا للحراره، ده غير قدرتها علي مقاومة الحرائق وآمنه صحيا وصديقه للبيئه وده بيخليها حل ممتاز وغير مكلف، بس للأسف غير متوفره بشكل كبير في السوق المصري

 

٢- العزل بالفوم أو البولي يوريثان

وده من أجود أنواع العزل الحراري، عشان الفوم بتكون كثافته مش عاليه وفي نفس الوقت وزنه خفيف، وفي نوع تاني من الفوم بيكون علي شكل سائل وبيتم تنفيذه بالرش ، وبعد الجفاف بيكون طبقه سميكه وصلبه وميزته إنه بيوصل للمناطق الضيقه والمساحات الصغيره


 

 

٣- ألواح البوليسترين

وده بيكون عباره عن ألواح لونها أزرق وبيتم تصنيعها بكثافات مختلفه، وبتيجي علي شكل ألواح بمقاسات وسماكات مختلفه علي حسب الطلب، تقدر تشوف مواصفاته الفنيه واسعاره لو، وتطلبه كمان ويوصلك لحد البيت لو ضغطت علي اللينك ده

ده غير ان في بعض المصانع المتخصصه، بيضيفوا عليه طبقه اسمنتيه عازله للمياه وبكده يكون عازل حراري ومائي في نفس الوقت

وتقدر تشوف المواصفات الفنيه للمنتج ده واسعاره لو ضغطت علي اللينك ده

 

٤- الاسمنت المخلوط بالفوم (الخرسانه الخفيفه)

وده بيكون عباره عن اسمنت ورمل وسن صغير مخلوط بفوم خفيف، وبيكون معبيء في شكاير جاهزه بحيث ان يتم خلطه بالمياه لعمل طبقه من الخرسانه الخفيفه اللي يمكن صبها علي اي سطح لعزله بشكل كامل

٥- الصوف الصخري

وده بيتم تصنيعه من البازلت وبيكون علي شكل ماده معدنية طبيعية وعلي شكل ألواح مرنه أو اسطوانيه، وده ميزته إنه بيستخدم كعازل للصوت والحراره

ولكن من عيوبه الكبيرة هو انه بيمتص المياه بشكل كبير، وده بيأثر علي قدرته علي العزل  مع مرور الوقت

 

٦- دهان اكريليك باللون الابيض

ودي احدث الطرق المستخدمه في عزل الحراره والرطوبه، وبيعتبر من اسهل طرق العزل لانه بيتم عن طريق دهان السطح باللون الابيض، بوشين او اكتر من ماده اساسها اكريليك ويفضل دهان وش طولي و بعدين وش عرضي، بس لازم تاخد بالك انه مش بيكون عازل حراري قوي لانه بيعتمد في الاساس علي ان اللون الابيض بيعكس اشعة الشمس، وبالتالي هو هيكون اضعف الحلول في عزل الحراره ولكن بيكون فعال وبيساعد في تقليل الحراره بشكل كبير مع وجود تكييف قوي داخل الشقه

وتقدر تشوف المواصفات الفنيه للمنتج ده واسعاره لو ضغطت علي اللينك ده

دول كانوا ال ٦ طرق اللي تقدر تحمي بيهم بيتك من الحراره العاليه ويارب يكونوا مفيدين بالنسبالكوا.