مشاكل و حلول الريزن

 كتابة

مأمير عبد الرحمن

مادة الريزن ايبوكسي هي نوع خاص من الريزن، بيتم تحفيزها باستخدام مصلب معين و بدون الحاجه لأي ظروف مناخيه معقده، و بينتج عن التفاعل ده اسطح صلبه جدا و ذات خصائص ميكانيكيه ممتازه، و بيتميز بردو بأنه غير سام و غير ضار بالبيئه..

 و لكن فنانين الريزن ساعات بيقابلوا بعض المشاكل أثناء الشغل، و عشان كده هنناقش المشاكل دي و هنعرض احسن الحلول ليها

بس لو متعرفش ايه هو الريزن و حابب تعرف اكتر عن فن الريزن يمكنك معرفة المزيد من المقال ده

١- الريزن لا يتصلب او بيستغرق مده طويله للتصلب

- في الطبيعي الريزن بيتصلب في مده تتراوح بين ١٢-٢٤ ساعه علي حسب الحاله الجويه، و لكن لو ده محصلش فبيكون في عدة اسباب، اكثرهم شيوعا هو:

- عدم إضافة المصلب بالنسبه الصحيحه، عشان كده لازم نراجع النشره الفنيه و نتأكد من اضافة المصلب بالنسبه المظبوطه علي حسب تعليمات المصنع، و مهم جدا انك لا تضيف كميه اكبر من المصلب المحدد.

- لو بتصب الريزن علي اكثر من طبقه، لازم تتأكد الأول ان الطبقه السابقه اتصلبت بشكل كامل، لانك لو صبيت طبقه جديده و الطبقه القديمه لم تتصلب بالشكل الكامل، هترتفع درجة حرارة الريزن و ممكن تتسبب في حرق الخشب المحيط في حالة صب الريزن علي الخشب

- لو كنت بتشتغل في مكان درجة الحراره فيه منخفضه، الوقت اللي هياخده الريزن للتصلب هيزيد بشكل كبير، يعني لو مثلا كنت بتشتغل في مكان درجة الحراره فيه ٢٥ درجه مئويه و انتقلت لمكان تاني درجة الحراره فيه ١٥ درجه مئويه وقت تصلب الريزن هيتضاعف، و عشان كده يجب استخدام مصدر حراره خارجي زي دفايه او تكييف ساخن لزيادة درجة الحراره المحيطه

- اغلب المشاكل المتعلقه بعدم تصلب الريزن بشكل صحيح بيكون سببها الخلط الغير صحيح، و عشان كده لازم نتأكد من خلط الريزن و المصلب بعنايه لمدة دقيقتين عالأقل

- في حالة الرغبه في استخدام الوان الريزن، يجب الخلط جيدا بعد تمام خلط الريزن و المصلب جيدا جدا و ليس قبلها

- يجب استخدام المصلب المصاحب للريزن و تجنب استخدام اي مصلب تاني لمنتج تاني لان ده ممكن يسبب في عدم الحصول علي النتيجه النهائيه المرغوب فيها

٢- الريزن لا يلتصق جيدا

- لو كنت عايز تستخدم الريزن كرابط او لو عايز تعمل River Table ممكن تواجهك بعض المشاكل الخاصه بتماسك المنتج

- لو بتشتغل علي سطح مسامي، هيقوم السطح بامتصاص الريزن بشكل كبير و خاصة الطبقه الاولي و لذلك يجب عمل طبقه ثانيه من الريزن خصوصا علي الحواف المراد التصاقها

- لو بتشتغل علي الخشب، حاول تنظف و تنعم السطح، مع مراعاة عدم تخشين السطح اثناء التنظيف لان التخشين يقلل من التصاق الريزن

- يجب التأكد من توزيع الريزن بالتساوي علي السطح

 

 

٣- الريزن يفقد لمعانه

لو حسيت ان الريزن ابتدي لونه يطفي مع الوقت، فالسبب الارجح هو تغير المناخ المحيط و لذلك لتفادي الظاهره دي، احرص علي استخدام مصدر حراره خارجي زي التورش للتخلص من اي رطوبه زائده داخل الريزن

٤- تكون طبقه لاصقه علي سطح الريزن

بمجرد ان يتصلب الريزن، ممكن يظهر طبقه لاصقه علي السطح، يمكن التخلص من هذه الطبقه بسهوله عن طريق مسح السطح جيدا باستخدام قطعة اسفنج مبلله بماء ساخن، و يمكن تجنب هذه الظاهره عند مراعاة الآتي:

- تجنب التغير الحاد في درجات الحراره بشكل مفاجيء

- تجنب العمل بكميات صغيره، حتي عند عمل الاكسسوارات حاول انك تخلط كميه معقوله من الريزن لتجنب تكون اي شوائب علي السطح

- التقليل من استخدام مصادر ثاني اكسيد الكربون لانها بتساعد علي تكوين الطبقه السطحيه

- استخدام وعاء تقليب دائما و تغطية الريزن عند التوقف عن استخدامه هيساعد في عدم تكون الشوائب علي السطح

٥- فتحت المصلب و لقيت لونه مايل للاحمرار

بتحصل الظاهره دي عند تخزين المصلب لفتره طويله، و ده طبعا بيخلي الريزن يفقد شفافيته و لكن الاحمرار في اللون لا يؤثر علي قوة تفاعل المصلب مع الريزن و لذلك يمكن استخدام المصلب في الحاله دي طالما المنتج النهائي المطلوب غير شفاف

 

٦- ملمس سطح الريزن يشبه قشر البرتقال

بتحصل الظاهره دي ساعات علي سطح الريزن بعد التصلب و ده بردو بيكون نتيجة درجة الحراره المحيطه، و يمكن تجنبها باستخدام الطرق التاليه

- لو لم يكن الريزن تصلب بشكل كامل، استخدم رولة دهان لتنعيم السطح، الطريقه دي هتساعد علي اختفاء النتؤات من علي سطح الريزن

- لو كان الريزن تصلب مبدأيا ممكن تعمل طبقه رقيقه جدا من الريزن (اقصي تخانه ٢ مم) تغطي السطح بالكامل

- لو كان الريزن تصلب نهائيا يمكن صنفرة السطح باستخدام صنفره ١٠٠ ثم دهان السطح بطبقة ريزن شفافه

 

٧- بستخدم ورنيش لتلميع الريزن و لكن مش بيتماسك

- لو الريزن ماخدش فرصه ليتصلب بشكل كامل ممكن الكلام ده يؤدي ان الورنيش المستخدم لا يكون متماسك مع الريزن، و لذلك يجب ترك الريزن ليتصلب لمده ٢٤ ساعه اضافيه قبل تطبيق الورنيش

- استخدام الورنيش المظبوط شيء مهم جدا للحصول علي النتيجه المطلوبه، يجب عدم استخدام ورنيش غير متطابق مع الريزن اللي بتقوم باستخدامه

- لو شوفت طبقه سطحيه تكونت علي سطح الريزن، قم بإزالتها باستخدام الاسفنجه المبلله زي ما وضحنا في خطوه رقم ٤

 

٨- الريزن بيتصلب بسرعه جدا

في بعض الاحيان ممكن الريزن يتصلب بسرعه لو درجة الحراره المحيطه عاليه جدا، و لذلك من المهم جدا الحفاظ علي درجة الحراره داخل الغرفه بحيث انها متزيدش عن ٢٥ درجه مئويه كحد اقصي، مع مراعاة عدم خلط جرعات زائده من الريزن و المصلب كما تم التوضيح سابقا

 

٩- بعد خلط الريزن ظهرت فقاعات هواء علي السطح

- تعتبر مشكلة ظهور فقاعات الهواء من اكثر المشاكل شيوعا في الريزن، و عشان نتجنب ظهور الفقاعات دي لازم نتأكد من تقليب الريزن بعنايه و ببطء عشان نتجنب دخول فقاعات الهواء داخل الريزن

- يمكن ازالة فقاعات الهواء باستخدام مسدس الحراره اللي لازم تحركه لمدة ١٠ دقائق علي السطح

- في حالة ظهور فقاعات بعد التصلب يمكن صب طبقه جديده من الريزن علي السطح لإخفاء الفقاعات

١٠- عند استخدام الريزن مع الفايبر جلاس تظهر ثقوب صغيره

لما بنستخدم الريزن مع الفايبر جلاس بتظهر ساعات بعض الثقوب الصغيره علي السطح، يمكنك التخلص منها عن طريق ملء الثقوب بالريزن باستخدام العصا الخشبيه (الستيكس) او السكينه و تركها لتجف ثم عمل طبقه جديده من الريزن علي السطح

١١- الريزن بعد الصب ليس نظيف تماما

الريزن بيتأثر بأي شوائب في الجو بشكل كبير و عشان كده لازم نكون حريصين جدا اننا نقوم بتنظيف كل المعدات و الادوات اللي بنستخدمها قبل و اثناء الشغل بالريزن، مع التأكد من نظافة كل ادوات الريزن المستخدمه

تابعونا في المقالات الجايه، عشان نعرف معلومات اكتر عن ال DIY

 

و انضموا لجروب بيزي هاندز اكبر تجمع لل DIYers في مصر و الشرق الاوسط بالضغط علي اللينك ده

يمكنك قراءة المقال الأصلي بالضغط علي اللينك ده