الريزن مضر؟
كتابة وإعداد:

د. دعاء محمد

مؤخرا كتير مننا سمع وقرأ عن الأضرار اللى ممكن تسببها مادة الإيبوكسي أو الريزن، وبعض ممنا قرأ بردة إنه بيسبب أمراض على المدى الطويل، لدرجة إن فى ناس بطلت تشتغل بيه أو تستخدمه في أى حاجة بعد ما كانو حابينه وحابين الشغل اللي بيعملوه بيه.

عشان كدة قلت لازم أبحث وأتكلم معاكوا عن الموضوع دة عشان نحاول نفهم اكتر هل الإيبوكسي أو الريزن فعلا مضر ولا لأ.

 

طيب في البدايه كده خلينا نرجع شوية لأصل مادة الإيبوكسي، و هنحاول نشرح المصطلحات  ببساطة من غير ما ادخلكم فى اسماء مواد كيميائية صعبة.

مادة الإيبوكسي هي عبارة عن مادة كيميائية مكونة من مادتين :

الأولى هى الريزن Resin ودى مادة بتستخلص من أشجار بتنمو في الغابات خصوصا في منطقة جنوب شرق آسيا، والتانيه هى المصلب أو ما يعرف باسم Hardener وده عبارة عن سائل يتكون من بعض المواد الكيميائية، المواد الكيميائية اللى بتضاف على الريزن هى اللي بتخليه صلب وشفاف ومقاوم للأحتكاك وينفع يدخل فى استخدامات كتيرة .

الناس اللى درست كيمياء عارفة ان المواد الكيميائية لما بتضاف على بعضها بيحصل تفاعلات كيميائية، التفاعلات دى ممكن ينتج عنها  أبخرة أو مواد مترسبة.

طيب إيه لازمة الكلام ده؟ أقولكم لزمته ايه، إحنا لما بنشتري الايبوكسي بيبقى عبارة عن علبتين واحدة ريزن والتانيه مصلب وبنخلطهم على بعض بنسب معينة ونتيجة للخلط بيحصل تفاعل كيميائي وبينتج عنه بعض الأبخرة، لذلك لازم ناخد الاحتياطات اللازمة عشان نقدر نحمي نفسنا من الأبخرة دي.

عشان كدة هقولكوا علي خمس حاجات مهمة جدا نعملها وإحنا شغالين بالريزن هتساعدنا بشكل كبير إننا نحمي نفسنا من المخاطر اللي ممكن تنتج عن تعرضنا للمواد الكيميائية والأبخرة دي.

في مقال قبل كدة اتكلمنا عن الإحتياطات اللى المفروض ناخدها قبل ما نبدأ نشتغل بالريزن لو مقريتش المقال دة تقدر تقراه من هنا. 

 

resin risk

 

في مقال النهاردة هنأكد اكترعلى بعض النقط المهمة اللي مينفعش حد يهملها وهو شغال بالإيبوكسي أو الريزن.

أول حاجة: ظروف ومواصفات المكان اللى هنشتغل فيه:

لازم المكان اللي بنشتغل فية بالريزن يكون فية تهوية كويسة جدا جدا ودى من الحاجات اللى مينفعش نستهون بيها عشان يحصل تجديد للهواء الموجود في المكان طول الوقت وميكونش فيه أى أبخرة ضارة.

تانى حاجة: لبس الماسك

لازم نلبس ماسك (تقدر تعرف سعرة وتشترية من هنا) وإحنا شغالين بالريزن عشان متدخلش اى أبخرة عن طريق التنفس ودى بردو من الحاجات اللى مينفعش نستهون بيها.

تالت حاجة: لبس الجوانتي أو قفازات اليد

لازم نلبس جوانتي (تقدر تعرف سعرة وتشترية من هنا) عشان مادة الإيبوكسي بعد التفاعل ممكن تسبب التهاب للجلد لو جلدك حساس، ودة بيختلف على حسب طبيعة كل واحد مننا، فى ناس جلدها مش بيتأثر بالريزن و في ناس جلدها بيتأثر فعشان نتجنب المشكلة دى، لازم نلبس جوانتى عشان حتي لو جلدك مش حساس يبقى تحمي إيدك من  لزوجة المادة عشان متتضايقش وانت بتشتغل.

رابع حاجة: لبس نضارة الحماية

النضارة مهمة عشان نحمى منطقة العين لأن للأسف فى ناس وهى بتشتغل بيجى الريزن عند عينيهم وطبعا ده غلط جدا. ولو بتلبسوا عدسات لاصقة يفضل تقلعوها أثناء الشغل وتلبسوا النضارة العادية حتي لو ملبستوش نضارة الحماية.

خامس حاجة: الأطفال تستخدم الريزن بعد الجفاف فقط

وأخر حاجة للناس اللى عندها اطفال يفضل المكان اللى هتشتغلو فيه يكون بعيد عن الأطفال خالص لأن مناعتهم بتكون لسة ضعيفة وممكن يتأثروا بسهولة، ولكن بعد جفاف الريزن واستخراج المنتج النهائي يمكن للأطفال استخدام منتجات الريزن بكل أمان.

آخر حاجة عايزة أختم بيها، فن الريزن فن جميل وبيطلع إبداعاتك وبيخرج منك أى طاقة سلبيه وبتستمتع بيه وانت شغال فيه وعشان تستمتع وتطلع حاجات حلوة لازم تكون مطمن وانت شغال وعشان تكون مطمن لازم تعمل الحاجات اللى قولنا عليها عشان نحمى نفسنا ونشتغل واحنا مطمنين ومستمتعين .