"بيت مصري بشكل أوروبي"

كتابة: م. رغده عفيفي

شطبت بيتي وفرشت وجبت عفش جديد و مودرن و وغيرت الاضاءه وجددت كل دهانات البيت، ورغم كده لسه البيت شكله مش شبه بيوت بره، اعمل ايه تاني؟ ده انا حتي عملت جبسوم بورد في الحيطان وعملت سقف معلق كمان، اعمل ايه تاني عشان اخلي بيتي شكله حلو وشبه البيوت اللي بنشوفها في المسلسلات والافلام الاجنبيه؟!

بنقضي وقت كبير ونصرف فلوس كتير علي تشطيبات وفرش بيوتنا عشان نخلي شكله جميل، بس دايما بنحس ان بيوتنا مش شبه بيوت الاجانب اللي بنشوفها علي بينترست وجوجل، بس المفاجآه ان المشكله دايما مش بتكون في الحاجات اللي بنعملها، المشكله دايما في الحاجات اللي بننسي نعملها، عشان كده انا جيت اقولكوا علي ٨ نصايح اقتصاديه وسهله تجمل بيتك وتخليه شكله احلي

١- اهتم بالملمس

احسن طريقه تدي احساس بالجمال و الشياكه لأي غرفه في بيتك هو اضافة مفروشات ذات ملمس جميل، ضيف دايما مخدات مخمليه ناعمه، واغطيه من الفرو، وسجاد صغير من الصوف، اللمسات الصغيره دي بتعطي احساس بالرقي والاناقه في البيت والمنتجات دي تقدر تلاقيها بسهوله في مصر وباسعار مناسبه جدا

 

٢- الانطباع الاول اهم انطباع

مدخل البيت هو اول واخر حاجه زوار بيتك هيشوفوها، لازم تهتم جدا ان مدخل بيتك يدي احساس بالترحيب. اعمل ترابيزه جميله صغيره للمدخل، و حط عليها اباجوره شكلها شيك، و ممكن كمان تحط سلطانيه من الفخار فيها حلاويات، و جنبها زهريه جميله، ومفيش مانع انك تعلق مرايه عالحيطه، هتعطي احساس بمساحه اكبر للمكان حتي لو المدخل ضيق

 

٣- لا تتردد في التخلص من الأشياء القديمه

توزيع الاثاث في البيت بشكل يعطي مساحه، وشياكه وعمليه في نفس الوقت مهاره مش ناس كتير بتعرف تعملها، بس لو جربت اكتر من مره واحترفت الموضوع، هتقدر توزع العفش في بيتك بشكل جميل، بس اهم حاجه لو في قطعة اثاث قديمه ومش بتخدم الغرض منها اوعي تتردد انك تبيعها (طبعا الكلام ده مش بيشمل النيش عشان النيش ده قطعه اثاث مقدسه عند المصريين)، لما تفكر في قطعة اثاث دايما فكر في ابسط حاجه تناسب الثيم بتاع بيتك والوان الدهانات والحيطان ولو عايز تعرف ازاي تختار الوان بيتك اقرا المقال ده، ودايما ضيف رفوف خشبيه، واكسسوارات بسيطه تناسب الاثاث

 

٤- اظبط الإضاءه

توزيع الاضاءه بشكل خاطيء في اي غرفه ممكن يفقد الغرفه الجمال والشياكه اللي تستحقه، اهتم جدا بنوع الاضاءه في كل غرفه، هل شكله مودرن؟ و هل الاضاءه قويه زياده عن اللزوم؟ تركيب غطاء بسيط لمصدر الاناره بتكون فكره حلوه لتهدئه الاضاءه (مش لازم تكون نجفه و كريستال)، كمان اضافة اباجورات اضافيه علي الترابيزه الجانبيه بيكسر حدة الاضاءه القويه اللي جايه من مصدر الاناره الرئيسي

 

٥- ركز في التفاصيل

أي غرفه بتجددها إذا كانت المطبخ او الليفنج او السفره او حتي غرف الاطفال، لازم تهتم بالتفاصيل الصغيره فيها، يعني مثلا لو بتجدد المطبخ، فكر اذا كان طقم الاطباق والمعالق والسكاكين هيكون مفيد ولا لأ، ولو مش بيخدم ديكور المكان لازم تتخلص منه، ممكن تبيعه او تتبرع بيه اكيد هيكون مفيد لحد، واختار دايما اطقم تكون مناسبه لشكل الديكور بتاع بيتك، الكلام ده طبعا بينطبق علي المطبخ والحمام، حتي ابسط التفاصيل في غرف المعيشه وغرف الاولاد

 

٦- اهتم بالنباتات والورود

النباتات والازهار من الحاجات الجميله اللي بتساعد علي الاحساس بالانتعاش والنظافه في بيتك، بسعر و مجهود بسيط تقدر تحول بيتك لمكان مليان ورود وازهار جميله تساعدك علي اضفاء لمسه جماليه في بيتك وكمان تساعد علي تنقية الجو في البيت من التلوث والروائح الضاره و لو تحب تعرف اكتر عن كيفية الحفاظ علي نظافة وانتعاش بيتك اقرا المقال ده

 

٧- زين الشبابيك

الستاير من اهم الحاجات اللي بتعطي انطباع جميل عن بيتك، وكل ما كان لون الستاير متناسق مع لون الحوائط والاثاث كل ما اعطي انطباع اجمل عن الشياكة والاناقه في البيت

 

٨- علم نفسك

كل ما علمت نفسك اكتر عن كيفية تحسين بيتك بخطوات بسيطه، كل ما زادت خبرتك في تشطيب بيتك وزادت قدرتك علي اختيار الديكورات الاجمل في بيتك عشان كده بنشجعك انك دايما تتعلم حاجات جديده عن مبدأ اعملها بنفسك اللي بنشجعه في مركزي واحنا بنساعدك بالمقالات والفيديوهات اللي تزودك بالمعلومات اللي محتاجها عشان تحسن بيتك بشكل يسعدك ويخليك تحس ان بيتك شبه البيوت الاوروبيه واحسن كمان

 

دول كانوا ٨ نصايح يساعدوك تجمل بيتك ويارب يكونوا نفيدين بالنسبالكوا