البلاط وسنين البلاط ١

 

لفينا الدنيا كلها عشان نلاقي بلاط محترم، روحنا السلاب ومحجوب وشفنا كل الأنواع كليوباترا والجوهرة وآرت وأخيرا جبنا شوية بلاط فرز تاسع إنما إية!

 متعرفوش صنايعي محترم والنبي يركبلنا البلاط من غير ما يبوظة أحسن إحنا دافعين دم قلبنا وجايبين حاجه بالشيء الفلاني وعايزين صنايعي أيده نضيفة!

 بلاط فرز تاسع؟! صنايعي نضيف؟! إيه يا عم الكلام الغريب دة!

 ماتيجوا نفكر بطريقة مختلفه المرة دي؟ إية رأيكوا قبل ما ندوْر على صنايعي نضيف تعالوا نتعلم الطريقة الصح لتركيب البلاط عشان حتى لو جبنا صنايعي نص نص نبقي إحنا فاهمين هو بيعمل إية ونقفشة لو عمل حاجة غلط.

 تمام؟ بص يا سيدي أنا هحاول أبسطلك الموضوع واختصرهولك في شوية خطوات بسيطة وسهلة، هو الموضوع ممكن يكون طويل شوية بس صدقني يستاهل! أصل انت مش هتركب بلاط كل يوم. وإحنا في مركزي عندنا مبدأ بنقولة لكل عملائنا البلاط مش بيتركب غير مره واحدة بس! بس خليني أقولك حاجة مهمة في الأول، موضوع تركيب البلاط دة مش معجزة هو بس عايز دقة وشوية صبر، جاهز نخش في الموضوع؟

يلا بينا:

 مبدئيا كدة هنقسم تركيب البلاط لثلاث مراحل

١- مرحلة التجهيز (ما قبل التركيب)

٢- مرحلة التركيب

٣- مرحلة التفنيش (ما بعد التركيب)

 أولا: مرحلة التجهيز (ما قبل التركيب):

 أول حاجة لازم تعملها عشان تجهز شغل البلاط هو أنك ترفع المقاسات ودة طبعا هنعملة بشريط قياس (أو بنقول علية متر) هتاخد أبعاد الأرضيات والحوائط طول في عرض، وتحسب كمية البلاط اللي هتحتاجة بالمتر المربع وتزود علية نسبة هالك ١٠٪ يعني مثال (لو حسبت مساحة الأرضيات والحوايط ولقيتها ١٠٠ متر مربع يبقي انت هتحتاج كمية بلاط تساوي ١٠٠ متر + ١٠٪ = ١١٠ متر مربع، إحنا بنعمل كدة ليه؟ عشان إحنا دايما بنكون متوقعين إن هيكون في نسبة هالك ١٠٪ (اللي هي نسبة البلاط اللي هيتقطع ومش هيكون ليه استخدام). طيب اشمعنا ١٠٪؟ النسبة دي اتحددت بناء على الخبرة، اللي هي جت نتيجة تكرار الشغل لقينا أن متوسط الهالك بيكون تقريبا ١٠٪ في أعمال تركيب البلاط. وخليني أقولك بالمناسبه أن أول طريقة تعرف بيها إذا كان الصنايعي اللي انت جايبة شاطر ولا لأ؛ هي نسبة الهالك في شغلة يعني لو حسبت البلاط وزودت نسبة الهالك ولقيتة جالك بعد كام يوم وقالك إحنا هنحتاج بلاط تاني يبقي أول حاجة تعملها أنك تخلية يوريك البلاط المتقطع ومالوش استخدام، لو لقيتة كتير، يبقي الصنايعي ده مش بيرتب شغلة مظبوط.

 تاني حاجة المفروض تعملها هي أنك تجهز السطح (أرضية أو حيطة) بمعني أنك لازم تتأكد أن السطح اللي هتركب علية البلاط مفيش فية تشققات أو شروخ لأن الحاجات دي بتضعف تماسك البلاط مع السطح، طيب لو لقيتها تعمل إية؟ كلم مركزي على طول، ولو في برايز كهربا أو إكسسوارات في الحيطان يبقي لازم يتم إزالتها.

 

 تالت خطوة وأنا بعتبرها أهم خطوة في تركيب البلاط هي إنك تحدد أماكن تركيب البلاط أو بمعني أصح أنك ترسم توزيع البلاط عالحيطة أو الأرض قبل التركيب الفعلي و دة بكل بساطة تقدر تعملة باستخدام قلم ومتر، هتحدد نقطة المنتصف بتاعة البلاط  بأنك تقيس طول السطح اللي عايز تبلطة وتقسمه علي ٢ و بعدين تعمل نفس الكلام مع العرض وبعدين تقسم الناتج علي طول وعرض البلاط وبكدة تقدر تحدد أماكن تركيب البلاط وأماكن قص البلاط  وحاول أنك تختار الأماكن اللي هيكون فيها بلاط مقصوص و حاول تراعي أنها تكون في أماكن مستخبيه، ورا التواليت مثلا أو تحت الحوض. ولو شغال في الأرضيات لازم تحدد أماكن فتحات الصرف.

  رابع خطوة هي أنك تشد خيط من أول لأخر الحيطة أو الأرضية على منتصف الحيطة أو الأرضية اللي انت حددتة في خطوة تلاتة والهدف من الخطوة دي أنك تتأكد من أن البلاط ماشي على استقامة واحدة، الخيط دة بيتشد عن طريق تثبيت مسمار في الجوانب وربط الخيط من طرف لحد متوصل للطرف التاني.

 خامس خطوة والأخيرة في مرحلة التجهيز هي تغطية أي حاجة متثبتة عالحيطة ومينفعش تتشال زي الحنفيات مثلا وتتأكد أن الأرض متغطية كويس وانت بتشتغل في الحوائط.

 إن شاء الله في المقال الجاي هنشرح خطوات تاني مرحلة اللي هي مرحلة تركيب البلاط.

   تابعونا علي بلوج مركزي من هنا عشان تعرفوا اكتر عن المواد المستخدمة في البنا وادخلوا علي صفحتنا عالفيس بوك من هنا عشان تشوفوا إزاي هيقدر مركزي أنة يساعدنا أننا نحل المشاكل اللي بتواجهنا في البنا والتشطيبات.

 و لو عندك مشكلة في بيتك و عايزنا نساعدك في حلها إبعتلنا عالأيميل دة info@markazzy.com  و هيكلمك واحد من المهندسين المتخصصين بتوعنا و يساعدوك في حل مشكلتك إن شاء الله.