"عيوب و مزايا الدور الأخير"

كتابة

م. أمير عبد الرحمن

لو انت من سكان الدور الأخير في عمارتك، يبقي المقال ده عشانك.. و لو انت مش ساكن في عماره و عندك فيلا و او شاليه دور واحد يبقي المقال ده بردو عشانك.. لكن لو انت مش ساكن في الدور الأخير بس بتفكر يا تري ايه مميزات و عيوب السكن في الدور الاخير يبقي المقال ده هيكون مفيد جدا بالنسبالك..

 

في حاجه مهمه لازم ناخد بالنا منها قبل ما نعرف مميزات و عيوب الدور الاخير في اي مبني، أهمية المميزات و العيوب بتختلف من شخص للتاني يعني ممكن جدا تكون ميزه معينه أهم بالنسبالك من العيوب كلها و تخليك تتغاضي عن اي عيوب تانيه و ممكن العكس، ممكن عيب معين يكون ليه اهميه كبيره عندك و العيب ده يخلي اي ميزه ملهاش لازمه، و عشان كده إحنا في المقال ده هنعرض المميزات و العيوب و بنأكد ان مفيش نصيحه واحده تنفع كل الناس

اولا : العيوب

١- الحراره : سقف الدور الاخير بيكون معرض للشمس بشكل مباشر و بالتالي بيكون عرضه للحراره بشكل كبير و بالذات في خلال فصل الصيف، الموضوع ده بيسبب في زيادة درجة الحراره بشكل كبير داخل الشقه و ده بيخلينا نستهلك التكييفات بشكل اكبر من العادي و بيرفع استهلاك الكهربا

اصلاح العيب ده هو العزل و عشان نعمل عزل حراره بشكل مظبوط لازم نتبع الخطوات الصحيحه للعزل، لو حابب تعرف اكتر عن طرق عزل الحراره المظبوطه اقرا المقال ده

كمان استخدام المواد الصحيحه مهم جدا لعمل العزل بشكل مظبوط، مادة الفوم مثلا من المواد اللي ليها تأثير فعال في عزل الحراره تقدر تشوف المواصفات الفنيه للفوم و الاسعار لو ضغطت علي اللينك ده

٢- الرطوبه : زي ما بيكون سقف الدور الاخير معرض للحراره بيكون بردو معرض للرطوبه و بالتالي الامطار بتكون سبب في تجمع المياه علي السطح و مع الوقت بيحصل تسريب للمياه داخل البيت، و بيظهر بشكل واضح علي السقف من الاسفل علي شكل طقطقه في دهان الاسقف و الجدران

اصلاح عيوب الرطوبه هو عزل الرطوبه، و في مقال فات اتكلمنا عن طرق عزل الرطوبه المختلفه اللي بتساعدنا في الحفاظ علي المباني و تفادي تلف الدهانات تقدر تقرا المقال كامل من هنا

و زي ما بنقول دايما استخدام المواد المظبوطه اهم خطوه لعزل الرطوبه بشكل صحيح تقدر تشوف المواصفات الفنيه لمواد العزل المختلفه و الاسعار لو ضغطت علي اللينك ده

٣- في حالة عدم وجود مصعد أو أسانسير بيكون صعود السلم عمليه مرهقه جدا في المباني المرتفعه خصوصا للاطفال و كبار السن، و عشان كده يفضل وجود مصعد دايما في المباني اكثر من ٤ ادوار

ثانيا : المميزات

١- اول ميزه ان مفيش جيران فوقك و ده معناه انك عمرك ما هتصحي مفزوع علي صوت جري الاطفال الصبح ولا هتسمع خناقات عائليه من جيرانك

٢- ضوضاء اقل من الشارع بسبب الارتفاع عن الارض

٣- نقاء الهواء بسبب البعد عن عوادم السيارات و التعرض المباشر للتراب

٤- امكانية استخدام السطوح كمكان للاسترخاء او لاستضافة الضيوف و الحفلات

٥- لو في مشكله في مواسير الصرف او التغذيه يمكن استبدالهم بسهوله

٦- الفيو الجميل في حالة ارتفاع المبني عن المباني المحيطه

٧- سعر العقار في الادوار الاخيره بيكون عادة اقل من باقي الادوار بخصم ممكن يصل ل ٢٠ ٪

 

في النهايه زي ما قلت في بداية المقال، الدور الأخير له مميزات كتير بجانب العيوب و لو قدرنا نعالج العيوب هيكون الدور الاخير حل ممتاز للسكن المريح

تابعونا في المقالات الاسبوعيه علي مركزي عشان تعرفوا افكار جديده لتحسين البيوت