ديكور حوائط البيت

كتابة وإعداد

م. أمير عبد الرحمن،

خلصنا دهانات حوائط الريسبشن و حطينا العفش في مكانه و كله تمام، وجبنا كمان سجاده صغيره شكلها انيق اوي و ماشيه مع ديكور البيت، بس الحيطه كبيره و واسعه  وفيها فراغات كتير و حاسس ان انا عايز اضيف حاجه شكلها انيق و في نفس الوقت تضيف طابع جميل و متبوظش شكل الحيطه، يا تري اعمل ايه؟

 

اغلبنا بيقابل الموقف ده في البيت و مش بنعرف نتصرف ازاي، عشان كده النهارده جيت اقولكوا علي ٧ افكار نعمل بيها ديكور للبيت بشكل انيق من غير ما نملي الحيطه باشكال كتير تفقدها الجمال والاناقه المطلوبه

لصق علي الحائط

الاستيكر الملون

البلوجر المشهوره أجنيس هامر اخترعت طريقه هايله تزين بيها الحيطه وكمان تداري بيها عيوب الحائط بطريقه اقتصاديه وباستخدام مبدأ اعملها بإيدك، الاستيكرات الملونه هي عباره عن قطع من الورق ذات اللصق الذاتي تقدر تعمل بيها مجموعه من الألوان و الأشكال علي الحائط بشكل جميل، الميزه في الاستيكرات دي انها عمليه و سهل ازالتها في حالة انك عايز تغير شكل الديكور بعد كده

 

مفارش من النسيج او القماش

النسيج و القماش من الخامات اللي موجوده في مصر بوفره، وبتكون ممتازه في تغطية الحوائط بديكور جميل وانيق وممكن نصممه علي مزاجنا بالشكل اللي نحبه و ممكن كمان تغييرها كل فتره بتصميمات مختلفه تناسب الاثاث بتاعنا، والتكلفه مش بتكون عاليه خالص

صور للحائط

لصق الصور بشكل الطوب

مفيش حد فينا معندوش البوم صور في البيت، واغلبنا بيفضل سايب الصور دي ويفضل التراب يتراكم عليها و تتنسي، فكره جميله و مبتكره شوفتها في احد بيوت اصدقائي هي انه طلع كل الصور من الابومات و لصق الصور بتاعته و بتاعة عيلته علي الحائط بشكل الطوب، بس لازم تاخد بالك انك تطبع كل الصور بمقاس واحد وعند اللصق يتم لصقها بالتساوي جنب بعض عشان تعطي شكل الطوب بشكل مظبوط

رفوف البيت

الرفوف

استخدام الرفوف لديكور الحوائط فكره هايله، وعمليه جدا لان باستخدام الرفوف ممكن تزين الحيطه بشكل جميل و نفس الوقت تستخدمها كمكتبه او ممكن استخدامها لوضع قصرية زرع صغيره، بس في عيب واحد للرفوف هو انك هتحتاج دايما تعمل اخرام للتثبيت، ولكن الميزه الكبيره في الرفوف بالذات الرفرف الكبيره هي انك تقدر تغطي مساحه كبيره من الحيطه عليها و في نفس الوقت تقدر كل فتره تغير من الحاجات الموجوده داخل الرفوف و بالتالي شكل الحيطه كله يتغير، وتضيف علي الحيطه طابع جديد

 

ستاير البامبو

اول لما بنقول ستاير دايما بنفتكر الشبابيك، لكن في نوع من ستاير خشب البامبو ممكن استخدامها لعمل ديكور علي الحائط بشكل جميل ومريح للعين، وممكن كمان دهان الستاير بعد كده لتغيير اللون علي حسب مزاجك

ورد الزينه علي الحائط

ورد الزينه

زهور الزينه يمكن تجميعها وتعليقها علي الحائط بشك ديكوري جميل، وممكن لصقها بشريط لاصق بسيط يخليك تقدر تغيرها في اي وقت بالأشكال اللي تحبها

 

تعليق المقتنيات الغير مستخدمه

صديق ليا بيحب يلعب جيتار، كل فتره بيغير الجيتار بتاعه ويجيب جيتار جديد، اخر مره زورته فيها لقيته  معلق جيتاره القديم علي الحائط، الفكره عجبتني جدا لانها اعطت للحائط شكل ديكوري جميل وعبرت عن شخصيته و الهوايه اللي هو بيفضلها

دول كانوا ٧ أفكار للبيت تقدر تجدد بيهم ديكور حوائط بيتك بدون تكلفه عاليه، وتملي الفراغات في المساحات الكبيره بأشكال جميله تعبر عنك و عن شخصيتك، لو حابين تعرفوا اكتر عن افكار جديده لديكور البيت تابعوا المقالات اللي بننشرها كل اسبوع مركزي