أعزل رطوبة ليه؟

المقال اللي قبل دة اتكلمت عن أنواع العزل المستخدمة في البنا بشكل عام. المرة دي هتكلم بالتحديد عن نوع يعتبر من أهم أنواع العزل.

نوع العزل اللي هتكلم عنة في المقال دة هو عزل الرطوبة؛ وعشان نفهم مدي أهمية عزل الرطوبة لازم نفهم الأول إية تأثير الرطوبة عالمباني وإية الأضرار اللي ممكن تسببها.

السبب في أهمية عزل الرطوبة أنة لو مش معمول كويس أو مش معمول أصلا؛ هيأثر عالمباني بصور واضحة وبيخلي شكلها وحش وممكن يؤدي لمشاكل أخطر كمان.

بس قبل ما نفهم يعني إية عزل رطوبة، خلينا نعرف الأول إيه هي الرطوبة؟ الرطوبة هي بخار المية الموجود في الهوا وأحنا بلدنا بطبيعتها الرطوبة فيها عالية نسبيا بس إحنا عامة كمهندسين لما بنقول عايزين نعزل رطوبة بيبقي قصدنا أن إحنا عايزين نعزل تأثير الميه أو بخار المية (اللي هي الرطوبة) عن الهيكل الخرساني اللي شايل المبني.

بس هو إية تأثير الرطوبة عالمباني أصلا؟

أول تأثير هو التأثير الظاهري.

عمرك وانت ماشي على كورنيش إسكندرية خدت بالك من العمارات (بالذات العمارات القديمة)؟  الدهانات بتاعة الواجهات بتاعة أغلب العمارات دي بتكون بايشة وتحس أنك لو مسكتها بأيديك هتقع؟

هو دة التأثير الظاهري للرطوبة؛ في الحالة دي الرطوبة بتدخل جوة الطوب والواجهات ويبوشها فيخلي شكلها وحش. متهيألي لاحظت في بيتك أو في بيت حد من صحابك أو قرايبك المنظر ده، السقف الدهان فيه بايش وتحس أنه يقع وهو دة التأثير الظاهري للرطوبة.

المعلومة دي ممكن أغلبنا يكون عارفها بس اللي في كتير مننا ميعرفهوش هو أن الرطوبة (أو المية) ليها تأثير أخطر عالمباني. التأثير دة اسمة التأثير الإنشائي.

التأثير الإنشائي دة خطورتة أنة مش بيخلي الدهانات تقع وبس، دة ممكن لا قدر الله يسبب في مشاكل إنشائية ممكن تؤدي لانهيار مباني.

من غير ما أدخلك في تفاصيل هندسية كتير، التأثير الإنشائي ده ببساطة هو أن ميه تتركن على سطح عمارة مثلا وتتساب فترة طويلة ويكون السطح دة مش معزول كويس فتبتدي الميه تدور على اكتر حتة مش معزولة وتبتدي تدخل جوة الخرسانة بتاعت السقف واحدة واحدة ويفضل السقف يشرب المية دي لحد ما يوصل لحديد التسليح.

عارف إية حديد التسليح؟ حديد التسليح دة هو الحديد اللي بنحطة وإحنا بنبني أي مبني وفائدتة الأساسية أنة يساعد الخرسانة في شيل أحمال المبني وينقلها للأرض. يعني من الأخر حديد التسليح دة هو الحاجة اللي شايلة المبني مع الخرسانة. ومعني أن المية توصل للحديد يعني في خطورة عالحديد أنة يصدي وبالتالي يضعف وطبيعي لما تبقي الحاجة اللي شايلة المبني ابتدت تضعف؛ يبقي دة معناه أن في خطر كبيرعالمبني.

شوفت أد أية الموضوع ممكن يكون خطير؟ بس الحمد لله في حد ابن حلال اكتشف اختراع عزل الرطوبة دة، المقال الجاي هتكلم عن الطرق المختلفة لعزل الرطوبة. وازاي بتتعمل وفين تلاقي المواد اللي تعزل بيها.

 إقرا المقال الجاي من هنا عشان تعرف المواد المختلفة اللي تقدر تعزل بيها الرطوبة.

.وتابعنا علي صفحتنا علي الفيس بوك  من هنا عشان تتعرف اكتر علي شغلنا

و لو عندك مشكلة في بيتك و عايزنا نساعدك في حلها إبعتلنا عالأيميل دة info@markazzy.com  و هيكلمك واحد من المهندسين المتخصصين بتوعنا و يساعدوك في حل مشكلتك إن شاء اللة.