أعزل رطوبة إزاي؟

لو قريت المقال اللي فات، يبقي أكيد عرفت خطورة الرطوبة عالمباني، وبالتالي عرفت أهمية عزل الرطوبة.

 لو مقريتوش ممكن تدوس على اللينك دة عشان تقراة.

 في مقال النهاردة هتكلم عن الطرق المختلفة لعزل الرطوبة، بس قبل مشرح الطرق، خليني الأول أجاوب على سؤالين ممكن يكونوا في دماغك.

إيه الهدف من عزل الرطوبة؟

الهدف من عزل الرطوبة بكل بساطة هو إن إحنا نعمل طبقة محكمة على السطح عشان نمنع المية من اختراق السطح دة.

 بنحتاج نعزل رطوبة فين؟

الأماكن اللي بتبقي محتاجة عزل رطوبة في أي مبني هي:

البدرومات،

الحوائط،

الحمامات،

المطابخ،

البلكونات،

الروف،

الخزانات،

حمامات السباحة.

 إية هي بأة الطرق المستخدمة في العزل؟

في طرق كتيرة لعزل الرطوبة بس أنا هتكلم عن الطرق الشائعة اللي أثبتت فعالية اكتر من غيرها.

 ١) العزل باستخدام الدهان البيتوميني

دهان البيتومين هو نوعية عزل مطاطية عشان المادة اللي بتستخدم في الدهان بتكون مادة مطاطة ومن مشتقات البترول يعني بيكون لونها أسود وفي ناس بتسمي الدهان البيتوميني، الدهان الأسفلتي.

البيتومين بيستخدم في دهان القواعد الخرسانية وبيكون طبقة حماية وعزل قوية، ولو استخدمناة فوق الأسطح بيفضل أنه يتصب علية طبقة مونة (سكريد) بنسميها طبقة حماية.

الدهان البيتوميني مش مناسب للتعرض لأشعة الشمس، لأن التعرض لأشعة الشمس بيحول الدهان البيتوميني دة لطبقة هشة وجافة.

 تقدر تعرف معلومات اكتر عن الدهانات البيتومينية وأسعارها على مركزي لو ضغطت على اللينك دة.

 ٢) العزل باستخدام لفائف الممبرين.

الطريقة دي من الطرق المعروفة في عزل الأسطح عشان فعاليتها.

العزل بالممبرين بيتطلب استخدام الحرارة عشان نلحم اللفايف مع بعضها وبنسمي ركوب اللفايف على بعض (آوفر لاب) وبنقول علي اللحام (لحام بشبوري) بس لازم قبل ما نفرد لفايف الممبرين على السطح لازم ندهن دهان بيتوميني (برايمر) عشان نضمن تماسك الممبرين مع الأرض.

 العزل باستخدام لفايف الممبرين بيعتبر من أقوي طرق العزل المتعارف عليها بس زي النوع الأول بردو بيتطلب أنة يتصب علية طبقة الحماية (سكريد).

 وتقدروا تعرفوا معلومات اكتر عن لفايف الممبرين وأسعارها على مركزي لو ضغطت هنا.

  ٣) العزل باستخدام الدهان الأسمنتي

العزل الأسمنتي يعتبر أسهل طريقة للعزل ودة بسبب أنها مادة سهلة في الخلط والتنفيذ.

الطريقة دي بتستخدم غالبا في المساحات الداخلية المعرضة للمية زي الحمامات وحوائط البيوت الداخلية.

العزل الأسمنتي هو دهان بيكون صلب بعد الجفاف بعكس الدهان البيتوميني اللي بيكون مطاطي، لذلك العزل الأسمنتي مش بيتعرض للتمدد ولا الانكماش ومش بيحتاج لطبقة حماية بعدة.

 نقدر نستخدم العزل الأسمنتي كمان في المشاريع الصناعية الغير سكنية زي محطات معالجة المية، ومحطات الصرف، والكباري، والسدود، والأنفاق.

 وتقدروا تعرف معلومات اكتر عن العزل الأسمنتي وأسعاره من مركزي من هنا.

  تابعونا علي بلوج مركزي من هنا عشان تعرفوا اكتر عن المواد المستخدمة في البنا وادخلوا علي صفحتنا عالفيس بوك من هنا عشان تشوفوا إزاي هيقدر مركزي أنة يساعدنا أننا نحل المشاكل اللي بتواجهنا في البنا والتشطيبات.

 و لو عندك مشكلة في بيتك و عايزنا نساعدك في حلها إبعتلنا عالأيميل دة info@markazzy.com  و هيكلمك واحد من المهندسين المتخصصين بتوعنا و يساعدوك في حل مشكلتك إن شاء اللة.