إسأل مركزي ومتسألش طبيب

نظرًا لإن إحنا في مصر، فلازم نتعلم نتأقلم مع واقع مجتمعنا المر ومن أكتر المشاكل اللي بنواجهها في البلد دي: هي إن مفيش حد في مصر بتسألة علي حاجة ويقول معرفش! جرب تسأل أي حد في أي حاجة لازم يحط التاتش بتاعة، لازم يفتي، فأنت عشان تتأقلم مع الوضع ده وتعالجة لازم تحصن نفسك كويس. بس إزاي؟

 كلنا عندنا دماغ الحمد لله بنفكر بيها لكن الدماغ لوحدها مش كفاية، لازم يبقي في جنبها شوية معلومات أساسية تقدر تحدد من خلالها الغلط من الصح من الأصح، و عشان توصل لحل هندسي مناسب للمشاكل اللي بتواجهك.

إحنا في مركزي هدفنا إننا نمدك بالقدر الكافي من المعلومات دي عشان تعرف تحل المشاكل اللي بتظهرلك في أعمال الصيانة أو البناء في بيتك، و نخليك تتفادي إنك تمشي ورا كلام العمال اللي ممكن يزودلك المشكلة بدل ما يحلهالك.

في المقالة دي هنتكلم عن بعض المشاكل الشائعة اللي الناس بتتعرضلها في مراحل التشطيب، و هنعرض بعض الأفكار لحلها و توضيحها.

١)

ساعات بيظهر شرخ في الحائط عند أماكن إلتقاء الحائط بالعمود زي ما موضح بالصورة.. إية سبب الموضوع دة؟ وهل دة خطر؟ وإزاي ممكن أعالجة؟

 

بص يا سيدي الموضوع ده بيتكرر كتير ولازم تعرف إنك مش محتاج  تقلق.. البيت مش هيقع عليك ولا حاجة.

إتكلمنا في المقالات اللي فاتت عن أعمال المباني و أعمال المحارة وإية هي الخطوات المظبوطه عشان نتفادي نوعية المشاكل دي (تقدر تقرا المقالات من هنا) وكان في ملاحظة اتكلمنا عنها بالتفصيل للأسف بعض العمال بيتغافلوا عنها.

اية هي الملاحظة دي؟

وانت بتمحر الحيطة دايما أماكن إلتقاء الطوب مع الخرسانة (عمود أو كمرة) بتبقي نقط ضعف للمحارة، عشان كدة بننصح دايما بوضع شبك حديد أو فايبر(يسمي بلغة العمال شبك بقلاوة). ولو انت قابلت المشكلة دي في بيتك جرب كدة تكسر في الشرخ، هيتضح إن مفيش شبك بقلاوة و ده اللي أدي لحدوث الشرخ.

الشرخ ليه بيحصل في الأماكن دي؟

الشرخ بيحصل في الأماكن دي تحديدا نتيجة لإن الطوب بيتمدد و بينكمش بمعدل غير معدل الخرسانة اللي ملاصق ليها، وده بيولد إجهادات شد علي طبقة المحارة اللي هتتحط علي المنطقة دي فبتعمل الشرخ دة. يعني بشرح هندسي بسيط كده، مثلًا: الطوب عاوز يتمدد ١ سم لليمين و العمود الخرسانة عاوز يتمدد بقيمة أكبر لليمين تقوم المحارة اللي لازقة علي الطوب و علي العمود تتشد فتشرخ. الكلام ده كلام علمي شوية مش شرط خالص إنك تفهمة بس المهم إنك تراجع ورا العامل إنة حط شبك بقلاوة في أماكن التقاء الخرسانة مع الطوب دي عشان يقوي المحارة و تتفادي حدوث شرخ في المناطق دي.

يبقي لو حصل عندك المشكلة دي لازم تزيل المحارة القديمة و تحط المحارة الجديدة بالمواصفات اللي اتكلمنا عليها.

الحالة الوحيدة اللي تبتدي تقلق منها بقي إنك لو شوفت الشرخ ده واصل و معدي في الكمرة الخرسانة، أو إن يكون الشرخ ده مكرر في نفس المكان في الأدوار اللي فوقيك أو تحتيك، ساعتها لازم تكلمنا في مركزي والمهندس المختص هيساعدك ويجي يعاين المشكلة عندك كمان لو  تحب عشان ده ممكن يكون خطر إنشائي بسبب هبوط في التربة، وإحنا في مركزي يهمنا سلامة بيتك.

 

 

٢)

بالنسبة لتزهير الخرسانة أو ظهور بقع أملاح بيضاء علي الخرسانة، إية تفسير الموضوع دة؟

كتير مننا ممكن يتعرض أثناء التشطيب لإنه ينسي حنفية مفتوحة و تغرق المياه البلاطة الخرسانية خاصةً أثناء تشطيب الحمامات، بعد جفاف المياه أو إزالتها من المحتمل ظهور البقع البيضاء دي.

ايه اللي ممكن يخليك تخاف من حاجة زي دي؟ّ!

أخطر حاجة بتأثر علي الخرسانة هي صدأ حديد التسليح اللي جوة الخرسانة، و عشان الحديد يصدي فهو عنده مسارين أول مسار صدأ الكربنة وده إستحالة أنه يحصل للخرسانة في أعمارها المبكرة ده بيحصل في المباني القديمة، تاني مسار هو صدأ نتيجة أملاح الكلوريدات و ده بيبقي عن طريق إن الأملاح دي دخلت الخرسانة بأي صورة من الصور زي إنها تكون موجودة في المياه اللي إتعرضت ليها الخرسانة، من أول هنا أنت تبتدي تقلق.. لكن اللي عايز أفهمهولك إن المياه اللي جت عشان نسينا الحنفية مفتوحة دي بتصنف بالنسبة للخرسانة إنها مياه نظيفة و مفيش قلق منها، و لكن اللي عليك إنك تتوخي حذرك منة هو إنك تعزل الخرسانة جيدًا عشان ميوصلهاش مياه ملوثة، و تنضف البقع دي بمياه نظيفة أو بإستخدام كيماويات متخصصة. و لكن في حالة تعرض الخرسانة لمياه ملوثة يبقي لازم تكلمنا في مركزي والمهندس المختص هيساعدك في حل مشكلتك.

 

   ٣)

إية هي مشاكل عزل الحمامات أو المطبخ أو السطح؟

 

من أهم المواضيع اللي ليها تأثير إنشائي كبير علي المبني هو عزل الرطوبة في الحمامات أو الأسطح المعرضة للأمطار أو الرطوبة بشكل كبير.

طيب خطوة العزل دي بقي لازم تصحصح فيها كدا مع العمال اللي معاك.

لسه كنت بقولك إن المياه أو الرطوبة ممكن تكون عامل إنها تعمل صدأ لحديد التسليح اللي في الخرسانة، ده غير المشاكل السلبية اللي بتأثر بيها علي أعمال التشطيبات.

 لازم تبقي فاهم ده كويس عشان مفيش عامل يقنعك إن عزل الرطوبة دة مالوش لازمة أو مش مهم أو السيراميك مش هيوصل مياه أو الكلام اللي بنسمعه ده.

عزل الرطوبة فيه منه وسائل كتير وفي مقال سابق اتكلمنا فية عن الموضوع دة بالتفصيل، تقدر تقرا المقال من هنا (لينك المقالة)

في أساليب عزل كتير وكلها ليها العمالة المدربة لتنفيذها وممكن أنت بنفسك تنفذها لأن الخطوات بسيطة. بس أنا مش جي أكلمك علي ده أنا جي أنبهك من مشكلة أغلب الناس بتقع فيها أو بتتعرضلها ومبتعرفش تختار حل مناسب، المشكلة دي سببها هو نقص خبرة أو استسهال من العمال أيا كانوا عمال سباكة أو عمال نقاشة في تنفيذ العزل.

بعد إختيارك للأسلوب المناسب للعزل لازم تختبره عن طريق إنك بتملي المكان بالمياه بعمق لا يقل عن ١٥ سم و تتركه تحت المتابعة لمدة لا تقل عن 24 ساعة و تشوف منسوب المياه حصل فيه تغير أو في أي رشح علي الدور اللي تحت، الإختبار ده هو اللي بيقطع الشك باليقين فعملية العزل و لابد منه.

ليه بقولك الكلام ده، عشان في بعض الأحيان هتلاقي العمال بعد ما ركبت العزل بيكسروا فيه لعمل فتحات لأماكن المواسير وده طبعًا بيلغي دور العزل تماما! وبعدين يقولك العامل أنا أختبرت العزل و طلع تمام، العزل كلة يعتبر مالوش لازمة لو تم التكسير فيه تاني فعشان كده أنسب طريقة لتطبيق العزل هو أن يتم التنسيق بين عمال السباكة ومعرفة الفتحات اللي في البلاطة و تنفيذها قبل تنفيذ العزل حتي لا يتم التكسير أو التخريم فيه، و يطلع بدون جدوي في الأخر و يجي جارك يشتكي من رشح عنده وساعتها هتتكلف تصليح عنده وعندك.

 و فيه ملاحظة برده لازم تاخد بالك منها أن العزل بيتطبق علي أول ٢٠ سم من الحوائط كلها مش علي البلاطة الخرسانية بس (اللي الصنايعية بيقولوا عليها رقبة إزازة)

تابع المقالات اللي جاية علي مركزي عشان تزود معلوماتك في أعمال البناء و التشطيبات و تقدر تحل المشاكل اللي في بيتك بحلول هندسية بسيطة وسهلة تتفادي بيها قلة الضمير و الغش أو عدم الكفاءة في التنفيذ.

كتابة وإعداد:

م. محمد راشد

 

المصادر:       https://www.thebalancesmb.com/how-to-remove-and-prevent-concrete-efflorescence-845101

https://specialties.bayt.com/ar/specialties/q/338587/%D9%85%D8%A7%D9%87%D9%88-%D8%A7%D9%84%D8%AA%D8%B2%D9%87%D9%8A%D8%B1-%D9%81%D9%8A-%D8%A7%D9%84%D8%AE%D8%B1%D8%B3%D8%A7%D9%86%D8%A9-%D9%88%D9%85%D8%A7%D9%87%D9%8A-%D8%A7%D8%B3%D8%A8%D8%A7%D8%A8%D9%87-%D9%88%D9%85%D8%A7%D9%87%D9%8A-%D8%AE%D8%B7%D9%88%D8%B1%D8%AA%D9%87%D8%A7-%D9%88%D9%85%D8%A7-%D9%87%D9%8A-%D8%B7%D8%B1%D9%82-%D9%85%D8%B9%D8%A7%D9%84%D8%AC%D8%AA%D9%87%D8%A7/

https://almohandes.org/uploads/default/original/1X/43a0dbf183ac2890e2a7640c2ee4648f4d5c071b.pdf