ازاي نختار صنايعي كويس؟

 

كتابة

م. أمير عبد الرحمن

 

مشكلة الصنايعيه من اكتر المشاكل اللي بتواجهنا كأصحاب بيوت، اغلبنا ان مكانش كلنا لو سألته ايه انطباعك عن الصنايعيه في مصر هيبقي رده مش تمام، و بصراحه اصحاب البيوت عندهم حق، التجارب اللي اغلبنا عاشها مع صنايعيه اغلبها بتكون تجارب سلبيه، بس المفاجآه انك لو روحت اتكلمت مع الصنايعيه و سألتهم عن انطباعهم عن اصحاب البيوت، هيكون ردهم بردو مش تمام، و برده هيكون عندهم حق، لان التجارب اللي بيعيشوها معانا اغلبها بيكون تجارب سلبيه و بتنتهي بمشاكل و خلافات

 

أغلب المشاكل بتكون علي تلات حاجات اساسيه يا الفلوس،  يا الوقت يا جودة الشغل اللي طالع، صاحب البيت بيكون دايما عايز يوفر في الفلوس و الوقت و الصنايعي حتي لو امين بيكون نفسه ياخد مقابل علي شغله بشكل مظبوط او بالبلدي كده مياكلش عليه فلوسه ، و وسط الشد و الجذب ده اللي بيضيع دايما هو جودة الشغل، و عشان كده احنا في مركزي من اهم المهام بتاعتنا كشركه هي رفع مستوي جوده الشغل في مجال البناء ، و ده بنعمله عن طريق توفير افضل الخامات و الادوات بأفضل الاسعار و مش بس كده، احنا كمان بنحاول دايما نضيف معلومات لاصحاب البيوت عشان يكونوا عندهم القدره علي التحكم في جودة الشغل اللي بيتعمل في بيوتهم

 

وعشان كده جيت النهارده اقولكوا علي ٣ نصايح نقدر نختار بيهم احسن صنايعي مناسب للشغل اللي عايزين نعمله في بيتنا

 

١- هات ٣ عروض اسعار من ٣ صنايعيه مختلفين

اغلبنا لما بيكون عايز يعمل شغل في بيته بيسأل صحابه و قرايبه و الناس القريبه منه عن صنايعي كويس يعرفوه، و اغلبنا بيعمل الموضوع ده بسبب اننا بنكون عندنا احساس دايما اننا مش واثقين في اي صنايعي، بالتالي بنحاول تعويض احساس عدم الثقه ده بأننا نسأل اكتر ناس بنثق فيهم عن صنايعي كويس و لو حد بنثق فيه قالنا فلان كويس مش بنتردد اننا نكلمه عشان يقوم بتنفيذ الشغل، و بالرغم من صحة الطريقه دي لكن من الضروري جدا اننا نسأل ناس تانيه او نحاول نشوف صنايعيه بطرق تانيه ، في مواقع متخصصه في الموضوع ده امثال:

Filkhidma

Fixawy

Taskty

كلها مواقع ممتازه و تقدر تدخل تشوف الصنايعيه اللي عندهم و تاخد عروض اسعار، الطريقه دي هتخليك تتأكد انك خدت سعر مظبوط و مش هتدفع زياده عن اللزوم ولا هيتضحك عليك

 

٢- اكتب عقد

عارف انك مش محامي و حتي لو محامي، انت معندكش وقت تكتب عقد، علي فكره كل اللي انت محتاجه ورقه بيضه مكتوب فيها اسم الصنايعي و الشغل اللي هيعمله و المده و السعر اللي اتفقتوا عليها، مش اكتر ولا اقل، و انتوا اللاتنين تمضوا عليها و خلاص، الابحاث بتأكد ان الانسان لما بيمضي علي ورقه حتي لو بسيطه بيزيد التزامه و الاحساس بالمسئوليه عن الشغل اللي بيعمله، و لو حابب تستخدم نموذج عقد مقاوله محترف و متخصص لبند معين، اضغط علي اللينك هنا و هتلاقي نموذج لاغلب البنود اللي بنحتاجها في بيتنا مكتوبه بشكل مفصل و سهل تقدر تستخدمها في العقد بتاعك

 

٣- اللي أوله شرط اخره نور

وانت بتكتب العقد بتاعك، اكتب مواعيد الدفعات الماليه كمان، بمعني انك متدفعش المبلغ اللي هيطلبه الصنايعي كله مره واحده من الاول، اغلب الصنايعيه بيطلبوا دفعه مقدمه لشراء الخامات و الادوات اللي هيحتاجوها و ده اللي احنا بنوفرهولك في مركزي تقدر تطلب كل اللي محتاجة و هنوصلهولك لحد البيت، باقي الدفعات اربطها بالشغل بمعني، انك لما تكتب ان لما الصنايعي يخلص الشغل بنسبة ٥٠٪ في اسبوع مثلا، متقوم بدفع ٥٠٪ من المبلغ المتبقي، و لما الصنايعي يخلص ٨٠٪ بعد كمان اسبوع مثلا هتقوم بدفع ٨٠٪ من المبلغ و هكذا.. وطبعا لازم تبقي محدد نسبة الشغل ايه المقابل بتاعها و تكتب الكلام ده في ورقة العقد ما بينكوا قبل بداية الشغل، بالطريقه دي هتضمن ان الصنايعي هيخلص الشغل في المواعيد اللي قال عليها و حتي لو اتأخر مش هتديله فلوس اكتر من حقه  و هتضمن حقك

 

حاجه مهمة جدا تاخد بالك منها ان الصنايعي الشاطر اللي واثق في شغله مش هيتردد ابدا انه يمضي معاك الورقه دي من البدايه

دي كانت شوية نصايح بسيطه نستخدمها عشان نقدر نختار الصنايعي المناسب لشغل بيتنا، تابعونا في المقالات اللي جايه

عشان تعرفوا افكار و نصايح جديده لتحسين البيوت