"فكره لعواميد بيتنا"

كتابه وإعداد

م. رشا أحمد

 

الصراع الأزلي بين التصميم والتنفيذ دايما بيسبب لينا كمهندسين او اصحاب بيوت مشاكل كتير، مفيش حد فينا مبيحلمش انه يكون عنده بيت بمساحه كبيره بدون اي عواميد داخليه

بس للاسف الواقع غير كده، العواميد في المساحات الكبيره شيء أساسي لضمان سلامة البيت، وعشان كده جمعتلكوا مجموعه من الأفكار الجميله لديكور العواميد في البيت - المصدر موقع هاوز

 

ضيف للعامود ملمس جميل

لو العامود في نص الريسبشن بالظبط وقررت تجلده خشب زود عليه ملمس جميل، برباط دوباره تقدر تلف العمود الخشبي زي اللي في الصوره، ولو بتحب تربي قطط في البيت هيكون حل مثالي للقطط اللي عندك، الإضافه دي هتكون عمليه وكمان هتضيف للعمود إحساس بالرقي والجمال

 

اعمل جزيره حول العامود

خلي العمود دايما نقطه محوريه في منتصف البيت، وحوله لمحطه عن طريق اضافة قطعة اثاث زي مكتب جميل يكون جزيره في وسط الغرفه هيكون عملي جدا وهيضيف لمسه راقيه جدا، لاحظ في الصوره ان الارضيه تشطيبها واحد لكن الكمرات والعمود حددوا المطبخ و لم يقللوا من المساحه داخل البيت

 

تجليد العامود بالحجر

يمكنك تجليد العامود نفسه بحجر جميل يعطيله شكل يوحي بالصلابه والقوه، ويضيفله ملمس يتماشي مع باقي الديكور الداخلي، و هيضيف لمسه من الاناقه داخل البيت

 

تعليق التليفزيون

لو العامود كبير زياده عن اللزوم ومش عارف تعلق التليفزيون فين، خلي العامود مركز الغرفه، وعلق عليه التليفزيون، مفهوم طبعا ان العامود بيكون من الخرسانه المسلحه وصعب التثبيت عليه، بس لو جلدنا العامود زي الصوره، هيكون عندك فرصه تعلق التليفزيون عليه، بس طبعا هيكون مطلوب منك تعمل حساب التوصيلات الكهربائيه حول العامود

 

خلي العامود مكتبه

جلد العامود خشب، وزودله بعض الرفوف، هيكون عندك مكتبه رائعه تقدر تحط فيها الكتب بتاعتك، وتقدر كمان تضيف دولاب صغير في الجزء السفلي، يضيف شكل جمالي و يتم استخدامه بشكل عملي

 

استخدم العامود للفصل بين مساحتين

لو عندك مساحتين كل مساحه ليها استخدام، مثال (ريسبشن ومطبخ امريكاني) ممكن تستخدم بعض الرفوف العرضيه حول العمود للفصل بين الغرفتين بشكل جمالي

 

ضيف منظر طبيعي

استخدم العامود لإضافة منظر طبيعي عن طريق استخدام جزوع الشجر في تجليد العواميد

 

اخلق تباين في التصميم

تصميم العامود بشكل مختلف عن باقي تصميم البيت بيعطي جمال للتصميم وبيعطيه لمسه من الرقي

 

في النهايه احب اقول ان العواميد زي ما ممكن تكون مصدر ازعاج لأي معماري او صاحب بيت، ممكن بردو تكون سبب في اضافة رقي وجمال للبيت ويعطوا مساحه اكبر وقدره علي استخدام قطع من الاثاث بشكل عملي، اهم حاجه اننا منحاولش نخبيهم بالعكس نحاول نظهرهم اكتر ونطوعهم لخدمة باقي ديكور البيت

 

تابعونا في المقالات الجايه واقرأوا المقالات اللي فاتت عشان تعرفوا معلومات اكتر عن كيفية تحسين بيوتكوا باشكال جميله وموفره