"الجبسون بورد"

 

كتابة

م. أمير عبد الرحمن

ناس كتير بعتتلنا تسألنا عن الجبسون بورد و أنواعه و استخداماته، بس قبل ما نتكلم بالتفصيل عن الجبسون بورد، لازم نوضح ان مصطلح جبسون بورد هو مصطلح مأخوذ من اللغه الانجليزيه و هو في الاصل

Gypsum board 

و معناه الالواح الجبسية و لكن طبعا بسبب تناقل المصطلح بشكل كبير بين الصنايعيه و اصحاب البيوت، اصبح معروف في السوق المصري باسم جبسون بورد او الجبسوم بورد  

في مقال النهارده هنعرف ايه هي انواع الجبسوم بورد، و ايه هي مميزاته و عيوبه؟ و هنعرف كمان ايه هي استخداماته و طرق و تركيبه، و في الاخر هناخد فكره عن اسعاره و اسعار المصنعيه بتاعته

الجبسوم بورد هو ماده مصنوعه من خليط من الجبس و الفايبر جلاس و السيليكون و بيتم استخدامها في تغليف و بناء الحوائط و ديكورات الأسقف، و بيتم تصنيعها علي شكل الواح بمقاسات ثابته بمقاس ١٢٠ سم * ٢٤٠ سم، و بيتم كمان تصنيعه بمقاسات اخري اكبر من ١٨٠ سم و حتي ٤٠٠ سم و لكنها قليلة الاستخدام و يتم تصنيعها علي حسب الطلب

 

ساعات كتير بنشوف الواح الجبسوم بورد بتكون ملونه، ايه السبب؟ و ايه معني كل لون؟

الماده المكونه للجبسوم بورد هي واحده في كل الانواع، و لكن اللي بيفرق هو التغليف او الطبقه السطحيه، و في ٣ الوان مشهورين جدا في السوق المصري

١- اللون الابيض و الرمادي

استخدام اللون الابيض و الرمادي مع استخدام اللاصق الجانبي باللون الازرق يعني ان النوع ده من الواح الجبسوم بورد هو النوع العادي الدارج  في السوق و يستخدم في اغلب انواع الحوائط او الاسقف ما عدا الحوائط و الاسقف المعرضه للرطوبه او خطر الحرائق

٢- اللون الاحمر او الزهري

و هو يشبه بشكل كبير النوع الاول و لكن يكون اللاصق الجانبي المستخدم باللون الاحمر، و يستخدم هذا النوع في الاماكن المعرضه لخطر الحرائق نظرا لمقاومته العاليه للحراره

٣- اللون الاخضر

و ده بيكون افضل و اغلي انواع الجبسوم بورد نظرا لقدرته العاليه علي مقاومة الرطوبه و الحراره في نفس الوقت و بيتم استخدامه بشكل اساسي في الحمامات و المطابخ و الاماكن المعرضه للرطوبه

 

استخدامات الجبسوم بورد:

فيه نوعين اساسيين من الاستخدامات:

١- الاستخدامات الديكوريه

الجبسوم بورد بيتم استخدامه كحوائط ديكوريه او لعمل اشكال جميله كديكور، كما انه بيستخدم في الاسقف المعلقه لان بيكون شكله جميل جدا خصوصا في حالة وجود اضاءه جذابه

 

٢- الاستخدامات الإنشائيه

يمكن استخدام الجبسوم بورد لعمل تقسيمات الحوائط الداخليه للشقق و البيوت، و يتميز بسهولة تركيبه مقارنة بالمباني الطوب لذلك بيستخدم بشكل كبير في الشركات و الفنادق و لتقسيم الغرف في المنازل

 

 

 

مميزات و عيوب الجبسوم بورد

أولا: مميزات الجبسوم بورد

سرعة و سهولة الفك و التركيب مقارنة بالمباني الطوب

خفة وزنه

لا يحتاج لطبقة محاره لتسويه السطح

 سهولة صيانة التوصيلات و التمديدات الكهربائية والصحية والتكيف بعد التركيب

يمكن تنظيف سطح الجبسوم بورد بسهوله باستخدام الماء

 

ثانيا: عيوب الجبسوم بورد

غير عازل للصوت (يمكن تفادي هذا العيب باستخدام حشو الصوف الصخري داخل قطاع الجبسوم بورد)

عدم القدره علي تحمل الاحمال الكبيره، مثال: لا يفضل تعليق شاشة تليفزيون كبيره علي حائط من الجبسوم بورد

 

طريقة تركيب الجبسوم بورد

يتم تركيب الجبس بورد بواسطة شاسيه معدني، يتكون من ٣ قطع اساسيين

١- الزاوية

الأوميجا

السى تشانيل

 

ويكون القطاع المعدني بسمك ٤ مم، ويتم تثبيت الزوايا على الجدران ثم  السى والأوميجات, ويشكل السطح المستوى وتثبت عليه الواح الجبسوم بورد و مسامير

 

بعد الانتهاء من مرحلة التركيب يتم تقفيل الفواصيل بشبك من الفايبر مصنوع خصيصا لتفادي الشروخ فيما بعد، ممكن تعرف سعره و تطلبه اونلاين لو دخلت علي اللينك ده

 

ثم يتم استخدام معجون كيم كراك لتغطية الفواصل الدقيقه بين الواح الجبسوم بورد

 

أسعار الجبسوم بورد

تختلف اسعار الجبسوم البورد علي حسب المحافظه، و لكن يتراوح سعر المتر توريد فقط من ١٠٠ - ١٦٠ جنيه، أما بالنسبه للمصنعيه او التركيب فالسعر للمتر يتراوح ما بين ١٩٠ - ٢٢٠ جنيه و في حالة المساحات الصغيره فيفضل الصنايعيه و اصحاب الشركات اعطاء السعر كمقطوعيه و ليس بالمتر المربع

 

دي كانت معلومات عامه عن الجبسوم بورد، لو عندكوا اي سؤال ممكن تتواصلوا معانا علي صفحتنا علي الفيس بوك من اللينك ده، و تابعونا في المقالات القادمه عشان نتعرف علي معلومات اكتر عن تحسين البيوت