"ألوان بيتك"

كتابة: م. منه صالح

اخترت الوان للبيت وبعد التنفيذ لقيت نفسي بقول مش هو ده اللي انا عايزاه.. كام واحد فينا اتعرض للمشكله دي؟

يا تري ايه اللي حصل غلط؟ ازاي اختار الوان للبيت متناسقه وشكلها لايق علي بعض؟

انا عارفه ان المشكله دي واجهت اغلب الناس اللي بتشطب شقتها، وعشان انا كنت واحده منكم، جيت النهارده اقولكوا علي شوية نصايح تساعدكوا في حل المشكله

١- أوعي تختار الوان الدهانات الاول

اغلبنا بيميل انه يختار الوان دهانات الشقه قبل ما يختار الوان الاثاث، ودي غلطه كبيره كلنا بنقع فيها واحنا بنشطب، نصيحتي ليك انك تختار الوان العفش الاول وبعد كده تختار دهانات الحيطان اللي تليق عليها، الطريقه دي اسهل وهتساعدك تختار دهانات الحيطه بالشكل اللي يعجبك

٢- ابدأ بأفكار مستوحاه

في مواقع وتتطبيقات موبايل بتساعدك بأفكار اتنفذت فعلا زي بينتريست وده من التطبيقات اللي بستخدمها في شغلي كتير، اعمل بورد بكل غرفه عندك في البيت وابتدي احفظ الأفكار اللي تشد عنيك. اول مايكون عندك ١٠ افكار عالأقل هتكون قدرت تكون فكره عن الالوان والاستايل اللي بتفضله

وانت بتدور علي افكار لالوان البيت بص علي ابسط الحاجات حوليك، يعني ممكن مثلا الوان المج اللي بتشرب فيه تديك فكره حلوه، اوعي تستهون بأي فكره تيجي في دماغك

٣- اهتم بالحياديه في الالوان

وهنا لازم نفرق بين نوعين من الالوان
الالوان الصريحه او البولد ودي الالوان الاساسيه الصريحه زي: الاحمر والاخضر والازرق وهكذا، علي قد جمال الالوان دي الا ان اختيار الوان صريحه كتير في مكان واحد ممكن يسبب ضوضاء ومنافسه بين الالوان وبعضها
الالوان الحياديه او النيوترال ودي درجات الالوان الفاتحه او الهاديه

مهم جدا واحنا بنختار الوان اي غرفه اننا نهتم بالحياديه في الالوان بمعني انك لازم تكون مقرر انهي مكان في الغرفه عايزه يشد الانتباه اكتر، يعني مثلا لو قررت ان الانتباه يكون عالحيطان، يبقي اختار الوان صريحه عالحيطان بس لازم تختار الوان حياديه في كل الاماكن الباقيه، وعشان كده الالوان الصريحه بتكون مناسبه علي حيطان الحمام مثلا لان كل حاجه في الحمام بعد كده غالبا بيكون لونها ابيض

٤- اهتم بعمل عينات

متستخسرش انك تعمل عينات صغيره من الالوان اللي عجباك عشان تجربها عالحيطه قبل ما تبتدي في تنفيذ الالوان اللي هتعملها، اهمية الموضوع ده انك هتقدر تشوف تأثير الاضاءه علي الالوان علي مدار اليوم وده هيساعدك انك تاخد قرار بشكل احسن. وانت بتعمل العينه حاول متعملهاش علي حيطه لونها ابيض عشان مش هتبين تأثير اللون الحقيقي، ولو عملتها علي حيطه لونها ابيض حاول تخلي حجم العينه اكبر شويه من الطبيعي عشان تقدر تحكم علي اللون بشكل احسن، ومتقلقش حتي لو مستخدمتش لون معين من العينات تقدر دايما تستخدمه ك توتش أب علي اماكن متفرقه او اماكن تانيه في البيت وتعمل بيها شكل ديكوري مميز

٥- نفذ عينات علي الواح

في طريقه ممتازه تقدر تختبر بيها تناسق الالوان مع بعضها وهي انك تعمل عينات علي الواح وتختبر تناسق الالوان مع الاثاث والعفش بتاعك


٦- اختار درجة اللمعان المناسبه

درجة لمعان الدهانات عامل مهم جدا في تغطية عيوب الحوائط، يعني لو عندك عيوب كتير في الحوائط حاول تقلل من درجة اللمعان علي قد ما تقدر، ودي شوية قواعد استرشاديه تساعدك في اختيار درجة اللمعان المناسبه لبيتك

دهان مط: وده بيكون دهان من غير لمعان خالص، ممتاز للغرف والاماكن اللي مش عليها حركه كتير زي غرف النوم والاسقف، عيبه انه بيكون صعب شويه في التنظيف

دهان اينامل: ده بيكون من غير لمعان خالص زي الدهان المط، ولكن بيكون اسهل في التنظيف وده بيكون ممتاز للغرف والاماكن اللي مش عليها حركه كتير زي غرف النوم ولكن يفضل في حالة وجود اطفال او حيوانات اليفه في البيت

دهان اينامل إجشيل: وده بيكون دهان بلمعه خفيفه جدا، ممتاز للاماكن اللي عليها حركه متوسطه، زي غرف المعيشه، وميزته انه بيكون سهل التنظيف

دهان نصف لمعه: ودة بيكون دهان بدرجة لمعان عاليه ولكن مش لمعان الزجاج، وعشان كده بيكون ممتاز للدهان في الاماكن اللي عليها حركه بشكل كبير زي الحمامات والمطابخ وميزته سهولة التنظيف ومقاوم للرطوبه

دهان لامع: وده بيكون دهان بدرجه لمعان عاليه جدا زي الزجاج، ومناسب جدا للاستخدام للاماكن الخارجيه وقطع الاثاث


٧- فكر في اللون الاساسي

وانت بتختار الالوان الحياديه في كرتله الالوان، هتلاقي ان كل درجات الالوان بتندرج تحت لون اساسي، حط في اعتبارك دايما وانت بتختار اللون حيادي، انك تبص علي اللون الاساسي عشان متحسش بعد ما تنفذ الحيطه ان اللون مايل لدرجه انت مش عايزها، الالوان الاساسيه دايما بتساعدنا في اختيار الالوان الحياديه بشكل مظبوط

   ٨- وحد ال الكلر ثيم بتاع البيت
Color Theme
اكيد انا مش بقولك ادهن البيت كله بلون واحد، بس في الغرف اللي جنب بعض او مفتوحه علي بعض حاول دايما تتخيل شكل الغرف مع بعض هيكون شكله عامل ازاي قبل ماتنفذ، ولو عايز تختار لون واحد حاول تبص علي درجات الالوان المختلفه في كرتله الالوان وتختار درجات مختلفه توزعها في المكان هتدي بعد وعمق جميل لبيتك، طبعا الكلام ده مش بينطبق علي غرف الاطفال اللي بتكون دايما الوانها زاهيه ومميزه