أعمال الدهانات مش محتاجة رخصة ٣

 

الناس اللي بتشطب جديد و اللي لسه مستلم شقته عالمحارة واللي عاوز يجدد دهان شقته  إجمع عندي هنا, عندي ليك شوية معلومات عن دهانات الحوائط هتستفاد منها و هتخليك خبير دهانات إن شاء الله.

عملية الدهان بوجه عام كده لأي سطح ممكن تتلخص في أربع مراحل رئيسية:

١- تنظيف السطح

 ٢- تطبيق طبقة سيلر لمعالجة السطح

٣- تطبيق المعجون لتسوية السطح

٤- تطبيق الدهان النهائي

 و لكن طبعًا في شوية إختلافات علي حسب السطح ونوع الدهان اللي أنت عاوز تدهنه زي ما إتكلمنا في المقالات اللي فاتت اللي تقدر تقراها كلها من اللينك دة

https://markazzy.com/blogs/news

  

و لكن بشكل عام تقدر تدهن أي حاجة انت عاوزها بإستخدام الخطوات الرئيسية دي.


 إحنا في المقالة دي هيبقي كلامنا عن الأسطح الخرسانية اللي هي موجودة في ٩٥% من المباني اللي حوالينا.

لازم تكون فاهم خطوات الدهان دي بشكل سليم عشان لو عايز تدهن بيتك بنفسك أو لو واقف بتشرف علي نقاش تبقي فاهم هو بيعمل إيه و تصلحله كمان أخطائه.

الخطوة الأولي

يتم تنظيف الحائط الخرساني جيدًا و إزالة جميع الأتربة و المواد الملوثة اللي علي الحيطة و إزالة البروزات بالحائط إن وجدت بإستخدام سكينة حديدية علي سبيل المثال و صنفرة السطح للتسوية بإستخدام أوراق الصنفرة مقاس (120/100) و بعد كده، لازم تنظف و  تعاين الحيطة بتعتك كويس أوي و توضح الأماكن اللي فيها ثقوب أو شروخ سطحية عشان يتم سدها بالمعجون فيما بعد.

الخطوة الثانية

هي تطبيق أول طبقة دهان علي الحائط و هو دهان البرايمر (أو السيلر)

بعد الإنتهاء من تنظيف الأسطح بندهن السطح الخرساني بالسيلر المائي,وبيبقي مكتوب علي العبوة إرشادات لكيفية تخفيفه بالماء بالكمية المطلوبة وممكن تسأل مندوب مركزي علي النشرة الفنية لأي مادة بتشتريها من مركزي.  طيب ما هي فائدة هذا الدهان؟ الخرسانة بطبيعتها مادة مسامية مليانة فراغات لا تري بالعين المجردة من أهم مميزات السيلر إنه بيملي المسام دي و بيعزز برده قدرة التماسك ما بين المحارة والطبقات اللي هيتم دهانها علي الحائط بعد كدة، بما فيها معجون الشروخ اللي هتسد بيه الشروخ اللي في الحيطة.

الخطوة الثالثة

دهان المعجون (سكينة المعجون)

بعد الإنتهاء من دهان السيلر يجب تهوية المكان و ترك السيلر مدة كافية لكي ينشف.

تأتي الخطوة الثالثة علي مرحلتين (يعني وجهين دهان علي الأقل أو سكينتين معجون زي ما الصنايعية بيقولوا) و خلي بالك لازم تسيب الوجه الأول ينشف الأول بعد كده تدهن الوجه التاني من المعجون بعد يوم عالأقل، المعجون ده فايدته إنه بيهيأ سطح الدهان عشان يبقي سطح ناعم و مستوي و سهل تطبيق عليه الدهان الأساسي (الوش النهائي)

 و برده بيستخدم المعجون في سد الثقوب الموجودة في الحائط.

بس في شوية ملاحظات بسيطة كده هقولهالك في خطوة دهان المعجون لازم تاخد بالك منها

- المعجون عبارة عن مركب واخد شكل العجينة شوية:

 ممكن يبقي بلدي و ده بيتعمل بخلط الغراء مع الماء مع الزيت المغلي مع الزنك و السبيداج بنسب معينة، وفيه طبعا المعجون الجاهز اللي تقدر تشترية بكل سهولة من علي مركزي.

- المعجون بيتم دهانه بإستخدام سكينة المعجون مش بالرولة فخلي بالك أنسب طريق للدهان هي إنك تميل السكينة دي بزاوية كده علي الحيطة و تدهن عشان تقلل من الهالك.

- يفضل دهان سكينة المعجون الأولي من أسفل لأعلي و سكينة المعجون الثانية في الإتجاه العمودي من اليسار إلي اليمين

- لو دهنت المعجون طبقتين و لسه شايف الحائط الخرساني (اللون الخرساني) يفضل تطبيق وجه ثالث من المعجون (سكينة تالتة) ولكن بعد أن يجف الوجه الأخير طبعا.

- خلي بالك إن المعجون مش مقاوم للماء فلازم تتأكد من عزل الحيطة كويس لو السطح معرض للرطوبة وتقدر تعرف معلومات اكتر عن العزل من المقال دة

دلوقتي إنت المفروض قدامك سطح  مستوي وجاهز عشان تدهن الحيطة بالدهان الأخير و لكن يفضل أن تقوم بعملية صنفرة مع تنظيف للسطح للحصول علي درجة نعومة تسهل عملية الدهان

 

 

الخطوة الرابعة

تعتبر الخطوات السابقة هي تحضير لطبقة الدهان النهائي (الوش النهائي) من الممكن تصنيف الخطوات السابقة كخطوات إنشائية بينما تعتبر الخطوة الرابعة والأخيرة هي الخطوة الجمالية التي سيتم فيها تحديد لون الدهان و نوعه و درجة اللمعان.

الخطوة الرابعة بتتم علي وجهين (وشين) بعد أن يترك الوجه الأول لكي يجف تماما.

الوجه الأول (وش البطانة)

الوجه الثاني (وش التشطيب النهائي)

تكون البطانة من الدهان المط لأنها ليست السطح النهائي و لكنها تكون من نفس لون الوجه الثاني, تتم عملية الدهان بالرولة في اتجاة واحد ويفضل استخدام الفرشة في الأماكن الضيقة و يجب الأخذ في الإعتبار الإختلاف بين الفرشات المستخدمة للدهانات الزيتية و الدهانات المائية للوصول لجودة أعلي في السطح النهائي.

في حالة دهان الحوائط يقع في الأغلب الأختيار علي الدهانات المائية (البلاستيك) نظرًا لتقدم التكنولوجيا في تصنيعها.

هي دي الخطوات اللي مفروض أي حد يتبعها للوصول لجودة ممتازة في الدهانات.

تابعونا علي بلوج مركزي من هنا عشان تعرفوا اكتر عن المواد المستخدمة في البنا وادخلوا علي صفحتنا عالفيس بوك من هنا عشان تشوفوا إزاي هيقدر مركزي أنة يساعدنا أننا نحل المشاكل اللي بتواجهنا في البنا والتشطيبات.
 و لو عندك مشكلة في بيتك و عايزنا نساعدك في حلها إبعتلنا عالأيميل دة info@markazzy.com  و هيكلمك واحد من المهندسين المتخصصين بتوعنا و يساعدوك في حل مشكلتك إن شاء الله.

 

المصادر:

https://www.doityourself.com/stry/how-to-paint-your-indoor-concrete-wall

https://www.wikihow.com/Paint-a-Concrete-Wall

                          https://www.bhg.com/decorating/paint/how-tos/how-to-paint-walls/