فن الريزن

 

كتابة وإعداد

د. دعاء محمد

فن الريزن، هو طريقة ممتعة ممكن تحسن بيها اثاث بيتك، تعملي بيه اكسسواراتك، ترسم لوحات تليق م ديكور بيتك، تعمل كوستر وحاجات كتير. الريزن عالم كل ما تعرفه اكتر وتتعلمه هتحبه وهتستمتع بيه وهتبدع

لو انت بتجهز بيتك مش هتحتاج تتعب وتدور على قطع ديكور باشكال معينة والوان تناسب ألوان بيتك، انت ممكن تعملها بنفسك وبالالوان اللي انت تحبها وكده انت هتوفر مجهود ووقت وفلوس كمان

فى البداية عايزين نعرف ايه هوالريزن، الريزن هو مادة كيميائية سائلة شفافة وسميكة وبتتحول لمادة عالية اللزوجة بعد ما بنضيف عليها مصلب خاص بيها

Handmade flower coasters

  

تعالى بقي اقولك شوية احتياطات امنية كدة قبل ما تشتغل بالريزن

١- لازم المكان اللي تشتغل فيه يكون نضيف وجيد التهوية

٢-  لازم تستخدم ماسك وجوانتي ولو هتشتغل بكمية كبيرة يفضل تلبس نضارة حماية

٣- غطى المكان اللى هتشتغل بيه بورق بلاستيك

٤-  ياريت يكون معاك علب عشان تغطى بيها شغلك عشان تحميه من اى تراب او اى حاجة فى الهواء لانه لو جه على شغلك هيخليه مش صافي لانها مادة شفافة جدا بيعكرها اى حاجة حتى لو كانت صغيرة جدا لا ترى بالعين المجردة

يلا بقي نحضر الحاجات اللي هنحتاجها عشان نشتغل بالريزن

ايبوكسي ١٥٠ ثري دي أو ايبوكسي كاست

اكواب معياريه

عصيان خشبيه

ميزان حساس

ورق صنفره ناعمه

ورق صنفره خشنه

ألوان كحوليه أو الوان مايكا

تورش أو بشبوري

خلاص كدة احنا جاهزين نبدأ نشتغل، مبدئيا كدة فى خطوات ثابتة هنعملها كل مرة قبل ما نشتغل بالريزن سواء عملت اكسسوارات او لوحات او اى حاجة من شغل الريزن، تعالى نعرفهم

١-  احنا عندنا علبتين واحدة مكتوب عليها راتنج ايبوكسى والتانية مكتوب عليها مصلب، ناخد الكمية اللى هنحتاجها للشغل بمساعدة الميزان الحساس اهم حاجة النسبة بينهم تكون ٣:١ ونخلطهم مع بعض كويس جدا لحد الخليط يكون شفاف باستخدام العصيان الخشبية بس نخلطهم ببطء عشان متعملش فقاعات

٢-  نقسم كمية الايبوكسى فى اكواب بلاستيك ونبدا نضيف عليهم الالوان اللى هنستخدمها سواء كانت ألوان سائلة او ألوان بودرة كمية صغيرة منهم هتديك اللون اللى انت محتاجة

٣-  هنخلطهم كويس فى الاكواب لحد ما اللون ينتشر فى المادة كلها

كدة احنا جهزنا الريزن بألوان مختلفة فى اكواب، دى الخطوات الاساسية اللى لازم نعملها قبل ما نبدأ، بعد الخطوات دى كل تطبيق من تطبيقات الريزن محتاجة خطوات مختلفة

تعالى نتكلم عن بعض تطبيقات الريزن وازاى نعملها 

كوستر الريزن

فى اشكال كتير من الكوستر ممكن تعملها، اشكال منتظمة زى الكوستر المدورة، المربعة، المسدسة او شكل عشوائى

١- لو هتعمل شكل منتظم للكوستر لازم يكون معاك قالب سيليكون بالشكل اللى انت عايزه

٢-  هنصب الريزن فى القالب بالالوان اللى حابين نعمل بيها الكوستر ونغطيه بعلبة كرتون او علبة بلاستيك المتوفر عندك وطبعا اهم حاجة العلبة متكونش لامسة القالب ونسيبه لمدة ٢٤ ساعة عشان ينشف

٣-  هنخرجه من القالب بكل سهولة ويفضل نسيبه من غير ما نستخدمه لمدة اسبوعين لكمال التصلب

Flower resin

 

اكسسوارات الريزن

١-  نحضر قالب سيليكون يكون فى اشكال مختلفة زى شكل القلب، شكل بيضاوى او اى اشكال تانية

٢-  نصب الريزن فى الاشكال اللى حابين نعمل منها قطعة الاكسسوار بتاعنا

٣-  نتركها ٢٤ ساعة لحد ما تنشف وتتصلب وبعدين نخرجها من القالب ونستمتع بقطعة اكسسوار جديدة عندنا

فى طريقة تانية ممكن نستخدمها سواء واحنا بنعمل الكوستر او الاكسسوار

بدل ما نستخدم ألوان ممكن نستخدم الريزن وهو شفاف ازاى، احنا هنصب طبقة ريزن شفافة فى القالب ونحط فوقها ورد مجفف مثلا ونسيبها تنشف لمدة ٦ ساعات تقريبا وبعدين نحط فوقها طبقة تانية من الريزن الشفاف ونسيبها تنشف لمدة ٢٤ ساعة ودي طريقة لطيفة عشان تعمل شكل تانى من غير استخدام ألوان وبردو هيكون حلو جدا

  

لوحات الريزن

التطبيق ده بالذات انت هتحبه جدا لانه فى لعب كتير وفن وابداع اكتر لانك بتستخدم فيه ألوان كتير وطرق كتير عشان تطلع بلوحة حلوة ومختلفة

تعالى نشوف خطواته ايه لان خطواته اكتر من التطبيقات اللى فاتت شوية

١-  بتحضر قطعة خشب اللى هترسم عليها اللوح

طبعا فى قطع خشب جاهزة للرسم عليها على طول وفى قطع تانية محتاجة تجهيز بس متقلقش حتى لو القطعة اللى معاك محتاجة تجهز انت ممكن تعمل ده بكل سهولة، هتجيب ايبوكسي ١٢٩ بي يو آر وتدهن بيه قطعة الخشب وتسيبه لحد تاني يوم عشان ينشف كويس ده هيسدلك كل المسام اللى موجودة في الخشب فمش هيتشرب الريزن لما تيجي ترسم بيه

٢-  هنجيب أربع اكواب بلاستيك ونحطهم تحت قطعة الخشب عشان نرفعها من على المكان اللى هنشتغل عليه عشان متلزقش عليه

٣-  دلوقتى هنبدا نحط الالوان ونبدأ نلعب فى طريقتين يااما نحط الالوان كلها فى كوب واحد بس من غير ما نخلطهم وبعدين نصبهم على اللوحة او نحط الالوان لون لون منفصلين عن بعض وبعدين نقلب اللوحة بايدينا يمين وشمال وفوق وتحت لحد ما تغطى اللوحة كلها

٤-  طبعا بعد ما نصب الالوان ممكن يكون فى فقاعات على سطح اللوحة هنشيلها باستخدام التورش

٥- لو حابب تعمل شكل مختلف للوحة ممكن تستخدم سبراى كحول وترش على اللوحة كمية قليلة هتعمل شكل خلايا لو مش حابب سيبها كدة واستمتع بمراقبة الالوان وهي بتدخل فى بعضها بشكل عشوائي جميل

٦-  اتاكد ان المكان اللى موجود عليه اللوحة متوازن مش مايل عشان الريزن ميتراكمش فى مكان معين من اللوحة

٧- غطى اللوحة بتاعتك بصندوق وسيبها تنشف لمدة ٢٤ ساعة ويفضل تركها لمدة ٣ ايام لكمال التصلب

 

 

Resin countertop

دلوقتي تقدر تطلب كل الخامات والادوات اللي بتحتاجها وانت شغال بالريزن لو دخلت علي اللينك دة

تابع المقالات اللي جاية علي مركزي عشان تزود معلوماتك عن الريزن وتتعلم اكترعن كيفية استخدامة عشان تعمل منتجات وأعمال جميلة تزين بيها بيتك وكمان تبيعها لو تحب