أخطاء الريزن
كتابة وإعداد:
د. دعاء محمد

المقال اللى فات اتكلمنا فيه ازاى نستخدم الريزن وإية الحاجات اللي ممكن نعملها بيه؟ لو مقريتش المقال ممكن تقراة تاني من هنا. وطبعا الناس اللى استخدمته ممكن يكونوا واجهوا شوية مشاكل حصلت معاهم. عشان كده .دلوقتى هكلمكم عن بعض الاخطاء اللى ممكن نعملها واحنا مش واخدين بالنا فينتج عنها نتيجة غير مرضية للشغل

وطبعا هقولكم حلها ايه عشان المرة الجاية وانتم شغالين متحصلش نفس المشكلة، وعلى فكرة الحاجات اللى هقولها لكم دلوقتى انا شخصيا اتعرضت لها وانا بشتغل بالريزن فى البداية بردو.

بس قبل ما نبدأ عايزين نتفق ان شغل الريزن بيحتاج صبر يعني بعد ما تصب الريزن انساه مش لازم كل شوية تروح تبص عليه عشان ده هيخليك تبوظ اللي انت عملته!!

أيوة زي ما بقولك كدة لأنك هتقول طيب أحط حاجة كدة او أعمل دى كدة،  وده هيتسبب فى ان الشغل يبوظ.  أنا شايفة ان دى اول حاجة كنا لازم أقولها قبل ما أبدأ.

يلا بقا نقول شوية حاجات ممكن تحصل ونقول نحلها ازاى وطبعا دى مش كل المشاكل دى شوية منها :

١- كتير مننا بيشتكى انه عمل حاجة من الريزن ومنشفتش او اتكسرت بعد مانشفت .

  • المشكلة دى بتكون بسبب إن البداية كانت غلط، يعنى إحنا أول حاجة لازم نعملها قبل مانبدأ نشتغل اننا نقرأ التعليمات اللى بتيجى مع الايبوكسى اللي هتلاقيها علي اللينك دة، يعنى لازم نركز في نسبة الخلط كام لكام، وبعد مانحط المادتين على بعض لازم نقلبهم علي بعض كويس جدا وقت كفاية عشان .تكمل عملية الخلط، الحاجتين دول مهمين جدا عشان تلاقي نتيجة كويسة فى الاخر

٢- ساعات قطعة الريزن بيطلع فيها زيادات وطبعا بتكون نشفت ومبنعرفش نشيلها

  • دى حلها الصنفرة والتلميع. يعنى ايه؟ يعنى تبدأ تصنفر الجزء اللى فيه المشكلة ولازم نبدأ من اصغر رقم فى الصنفرة يعنى مثلا صنفرة ١٥٠ لحد ما توصل لصنفرة ٣٠٠٠ او ٤٠٠٠ يعنى لازم تمر بالمراحل دى (ملحوظة كدة صغيرة للبنات لازم تلبسى جوانتى قبل ما تصنفرى عشان ايديك الناعمة تفضل ناعمة الرجالة مش هيفرق معاهم الكلام دة ) بعد مرحلة الصنفرة هتلاقى الزيادات اتشالت والمشكلة اتحلت بس ظهرت مشكلة تانية وهى إن القطعة بتاعتك لونها بقى باهت مبقتش بتلمع. متزعلش هنا تيجى مرحلة التلميع، وفى ملمع مخصوص تلمع بيه القطعة بتاعتك تحط الملمع على قطعة قماش وتلمع قطعة الريزن هترجع زى الاول وممكن حل تانى لو مش متوفر عندك الملمع انك تحط طبقة ريزن شفافة رقيقة هترجعها بتلمع زى الاول وانا شخصيا بفضل الحل ده.

 

٣- الناس اللى بتعمل كوستر ساعات بيشتكو انهم لما بيحطو عليه حاجة سخنة (كوباية شاى مثلا) بيلزق فى الكوستر.

  • المشكلة دى ليها شقين اول حاجة لازم أكون متأكد أن نوع الإيبوكسي اللى أنا شغالة بيه بيتحمل الحرارة طيب انا متأكدة انى بستخدم النوع المظبوط بس بردو لزق. ده بقى الشق التاني وهو أن الكوستر لازم نسيبه أسبوعين تقريبا عشان يكتمل التصلب بتاعه طيب أنا فعلا عملته ولزق فى حل؟ أه، ممكن نصنفر ونحط طبقة ريزن شفافة ونسيبها تنشف أسبوعين.

٤- طبعا إحنا بنبقى لابسين جوانتى وإحنا شغالين، طيب إفرض ملبستش وايدى جت عليها ريزن او لابس جوانتى بس فى جزء من إيدى جه عليه ريزن، اعمل ايه؟ اشيله ازاى وبنغسله وبردو بحس باللزوجة فى ايدى.

  • الموضوع ده بيضايقنى أنا شخصيا جدا. طبعا مادة الريزن مادة عالية اللزوجة، عشان كدة مش سهل اللزوجة دى تروح بس فى حل طبعا. نحط على ايدينا خل قبل ما نغسلها بأى حاجة وبعد كدة نغسلها بالصابون والمايه.

٥- ناس كتير بتخاف تشتغل فى الشتا بالريزن عشان بيسمعوا إنة مش بينشف او بيتكسر

  • هو فعلا بيحتاج وقت أطول عشان ينشف. دى حقيقة، يعنى كل اللى هنحتاجه إننا نصبر عليه شوية عشان يكمل التصلب بتاعه بس مفيش داعى ناخد شوية احتياطات عشان النتيجة تكون احسن حاجة، يعنى مثلا ندفى المكان اللى احنا شغالين فيه، فى العموم يفضل المكان اللى تشتغل فيه تكون درجة حرارته ٢٣ - ٢٥ درجة، الناس الاكتر اللى هتعاني من الموضوع ده هما الناس اللى بتشتغل حاجات محتاجة تتشكل بايديهم، عشان لازم يشكلوها قبل ما تنشف بالكامل لازم تكون طريه بس فى نفس الوقت مش لزجة، ولكن المشكلة دى هتتحل بالتجربة وهما هيعرفوا يظبطوا وقتهم يعنى مثلا بدل ما تشتغل بالنهار اشتغل بالليل وسيبها للصبح هتلاقيها نشفت بس لسة طريه يعنى تعرف تشكلها طبعا ده مجرد مثال يعنى كل واحد هيظبط وقته على حسب ظروفه.

٦- فى مشكلة تانيه بتواجه ناس كتير بعد ما يخلصو الشغل انهم مثلا يكتشفو ان الكميه اللى خلطوها عشان يشتغلو بيها مكفتش شغلهم او طلعت كتيره.

  • المشكلة دى يا إما تتحل عن طريق الخبرة إنك تجرب كذا مرة لحد ما توصل للكمية المطلوبة، يا إما حل تانى، فى مواقع بتحسبلك الكمية اللى هتحتاجها، بس هنحتاج ندخل طول وعرض القطعة اللى هتشتغل عليها والموقع هيحسبلك الكمية وده واحد من المواقع اللى ممكن تدخلوا عليها.

 

نتمنى نكون غطينا ولو جزء بسيط من المشاكل اللى ممكن تواجهكم وتضايقكم وانتم شغالين وياريت لو فى احد واجهته مشاكل غير دى يقولنا واحنا نقوله الحل ان شاء الله.

أهم حاجة عايزة أقولهالكم ان كل ما بنشتغل اكتر كل ما بنعرف أخطائنا اكتر ونعرف نحلها ودايما التجربة هى الحل، نجرب نعمل حاجات مختلفة لحد ما نوصل لأحسن حاجة ولو أول مرة طلعت نتيجة مش احسن حاجة مش هقول مش حلوة لأن كل اللى هتعمله هيبقى حلو وليه قيمة كبيرة المهم إنك متزعلش وتحبط نجرب تانى ونتفادى الخطأ اللى حصل اول مرة وهتلاقى نتيجة احسن من اول مرة والمرة اللى بعدها أحلى وأحلى.

آخر حاجة عايزة أقولها، فن الريزن فن إبداع ملوش مقاييس ثابتة تمشى عليها ولا شكل ثابت فن بيعتمد على خيالك وعلى إبداعك وعلى لمستك الخاصة اللى مش هتكون متشابهة مع حد تانى وعلى رؤيتك للحاجة اللى هتشتغلها ومدى حبك ليها.

دلوقتي تقدر تطلب كل الخامات والأدوات اللي بتحتاجها وانت شغال بالريزن لو دخلت علي اللينك دة.

تابع المقالات اللي جاية علي مركزي عشان تزود معلوماتك عن الريزن وتتعلم اكنر عن كيفية استخدامة عشان تعمل منتجات وأعمال جميلة تزين بيها بيتك وكمان تبيعها لو تحب.