البلاط وسنين البلاط ٢

 

لو قريت المقال اللي فات يبقي عرفت إزاي بنجهز لشغل البلاط قبل ما نبدأ التركيب. لكن لو مقرتش المقال اللي فات يبقي روح إقراة من اللينك دة لأنة مهم جدا.

 ندخل على مرحلة التركيب؟

يلا بينا..

بس خلينا نتفق قبل أي حاجة إن الصنايعية قالوا حكمة من زمان وعندهم حق فيها الحكمة بتقول "أهم من الشغل، تظبيط الشغل" وهقولك ليه عندهم حق.

شغل زي شغل البلاط ده عامل زي القص واللصق اللي كنا بنلعبة وإحنا صغيرين. أهم حاجه تكون مجهز الورق المقصوص قبل ما تلزقه ومحضر أنبوبة الصمغ ومعاك مناديل تمسح بيها أي زيادات ممكن تزيد وانت بتلزق.

 صمغ إية؟ وقص ولزق إيه؟ عايز أركب البلاط في الشقه يا عم!

 اسمع مني للآخر، انت لو محضر شغلك كويس قبل ما تركب: هتركب البلاط وانت مطمن وهتقلل نسبة الخطأ جدا وهيطلع شغلك جميل. عشان كدة بأكد عليك لو مقريتش المقال اللي فات يبقي لازم تقراه من هنا.

 أول حاجه تعملها في مرحلة التركيب هي أنك تطلع البلاط من الكراتين وترصه في أحد جوانب الأوضه بتاعتك وتتأكد أن مفيش بلاطات مكسورة أو فيها مشاكل ظاهره زي اختلاف في الألوان مثلا وبعدين ترتب البلاط علي حسب التوزيع اللي في دماغك أو في التصميم.

 ثاني حاجة تعملها ودي من أهم الخطوات هي أنك تحضر الصمغ اللي هتلصق بيه، إحنا في المعمار بنقول علية لصق البلاط أو ال Adhesive. إية حكاية مادة لصق البلاط أو ال Adhesive دة؟ وإية أنواعة؟ وإزاي بنستخدمه؟  وألاقيه فين؟

 بص يا سيدي مادة لصق البلاط دي مادة تم اختراعها حديثا من شركات متخصصة في صناعة مواد البنا، المادة دي بتخليك تستغني عن الأسمنت والرملة (اللي بنقول عليها المونة)، مش بس كدة..

 دي كمان بتخليك تلزق البلاط الجديد فوق البلاط القديم أو حتى فوق البلاط الموزايكو يعني مش هتحتاج تكسر البلاط القديم ولا تكلف نفسك شيل وتحميل ولا كل وجع القلب دة!

 مش بس كدة المادة اللاصقة دي بتخليك تلزق بلاط عالحيطان وعالأرضيات كمان.

 طيب إية أنواع المادة اللي بتلزق البلاط دي؟

بص ياسيدي في نوعين:

أول نوع دي بودرة جاهزة بتخلطها بمياه بنسبة معينة بتبقي مكتوبة في النشرة الفنية بتاعت المادة و بعد ما تتخلط كويس، تتحط عالحيطة بالمسطرين وتتفرد كويس، وبعدين تبتدي ترسم خطوط في المادة بطرف المسطرين أهم حاجة تكون الخطوط دي متوازية.

أما النوع التاني دة معجونة جاهزة مش محتاجة تتخلط بمية ولا حاجة، بتفردها بنفس الطريقة اللي فاتت وتلزق البلاط على طول.

أهم حاجة تاخد بالك منها في موضوع لصق البلاط دة أنك لو هتستخدم أول نوع اللي هو البودرة يبقي لازم تفرد مادة عالحيطة على قد البلاط اللي انت هتركبة في خلال نص ساعة عشان المادة متجفش.

إنما لو هتستخدم تاني نوع اللي هي المعجونة الجاهزة، خد راحتك يا معلم.

 تلاقي المواد دي فين؟

ودة سؤال يتسأل بردو مركزي دوت كوم بيوفرلك كل مواد لصق البلاط اللي انت عايزها وتقدر تطلبها أونلاين وتجيلك لحد باب بيتك وتقدر تاخد فكرة عن كل المواد و أسعارها لو دوست علي اللينك دة.

 تالت حاجة تعملها هي أنك تركب البلاط، وأهم حاجة تاخد بالك منها وانت بتركب البلاط أنك تبتدي تركيب من المكان الصح، يعني لو بتركب بلاط علي أرضية يبقي تبتدي تركيب من نص الأوضة بالظبط ولو قريت المقال اللي فات هتعرف إزاي تحدد خط المنتصف بتاع الأوضه بالظبط. ولو بتركب حيطان يبقي لازم تبتدي من تحت لفوق وطبعا تاخد بالك أنك تركب فواصل البلاط(الصلايب) مابين كل بلاطة وبلاطة وتبقي ماسك في أيدك مطرقة كاوتش خفيفة وتدق عالبلاط بالراحة جدا عشان تتأكد أن مفيش فراغ تحت البلاط.

 رابع حاجة هي إنك تشيل أي زوايد بتطلع من اللصق باستخدام الفوطة عشان يطلع البلاط شكله حلو، وخلي بالك أنك هتحتاج في وقت أنك تقص البلاط عشان الأماكن الصغيرة أو حول الشبابيك والأبواب ومفاتيح الكهربا ودة بيتم بالمنشار الكهربائي أو الصنايعية بيسموة الصاروخ وطبعا يكون التقطيع بحذر.

 بعد ما خلصنا مرحلة التركيب هندخل على المرحلة الأخيرة اللي هي مرحلة مابعد التركيب (أو التفنيش) ودي بتبقي بعد يوم من إنهاء تركيب البلاط بعد مانكون إتأكدنا أن اللصق نشف والبلاط ثبت في مكانة كويس.

 مرحلة التفنيش دي الصنايعية بيسموها (سقية البلاط) وإحنا بنقول عليها tile grouting ودي المرحلة اللي بنشيل فيها فواصل البلاط (الصلايب) ونبتدي نملا الفواصل بمادة السقية، وخلي بالك أن في عرف سائد أن الناس تستخدم الأسمنت الأبيض أو الجبس في السقية ودة بيعمل مشاكل بعدين زي أن السقية دي بتطلع من البلاط لأنة مش بيكون ماسك كويس دة غير أنة مش بيعمل مقاومة للتآكل والاحتكاك ومش بيحمي من المياة والبكتريا بعكس المواد المتخصصة اللي بتعمل كل الكلام دة.

 وتقدر تشوف أنواع مواد السقية وأسعارها لو دوست على اللينك دة.

  تابعونا علي بلوج مركزي من هنا عشان تعرفوا اكتر عن المواد المستخدمة في البنا وادخلوا علي صفحتنا عالفيس بوك من هنا عشان تشوفوا إزاي هيقدر مركزي أنة يساعدنا أننا نحل المشاكل اللي بتواجهنا في البنا والتشطيبات.

 و لو عندك مشكلة في بيتك و عايزنا نساعدك في حلها إبعتلنا عالأيميل دة info@markazzy.com  و هيكلمك واحد من المهندسين المتخصصين بتوعنا و يساعدوك في حل مشكلتك إن شاء الله.